ខ្សែការពារ Andy Robertson រំពឹងថាក្រុម Liverpool នឹងល្អប្រសើរឡើងនៅឆ្នាំ២០២៣នេះ ប៉ុន្តែជាក់ស្ដែងបែរជាអាក្រក់ឡើងទៅវិញ មិនដូចការសង្ឃឹមទុកនោះទេ។
ក្រុម Liverpool បានរបូតពានរង្វាន់ FA Cup មួយទៀតហើយ ក្រោយពីយប់មិញនេះពួកគេលេងចាញ់ក្រុម Brighton ក្នុងលទ្ធផល ២-១។ ខណៈដែលទម្រង់លេងក្រុមវិញ ក៏អ្នកគាំទ្រមិនសប្បាយចិត្តនោះដែរ ព្រោះវាមិនបានប្រសើរឡើងជាងនៅឆ្នាំ២០២២នោះទេ។ កីឡាករលេងហាក់មិនមានអារម្មណ៍នៅក្នុងខ្លួន ហើយបើមានឱកាសក៏មិនអាចសម្រេចទីបានថែមទៀត។
Andy Robertson ខ្សែការពាររបស់ក្រុម Liverpool បាននិយាយក្រោយចប់ការប្រកួតនៅយប់មិញថា៖“នៅរដូវកាលនេះមិនមានអ្វីល្អនោះទេ។ នៅឆ្នាំថ្មីនេះ យើងសង្ឃឹមថានឹងទទួលបានផលល្អវិញ ប៉ុន្ដែវាមិនបានកើតមានឡើងឡើយ។ យើងកាន់តែយ៉ាប់ជាងមុនទៅទៀត។ នៅលីគ យើងធ្វើមិនបានល្អ ហើយពេលនេះយើងក៏បានធ្លាក់ចេញពី Cup ទាំងពីរថែមទៀត”៕