លោក Diego Simeone អាចនឹងរបូតតំណែងអ្នកចាត់ការក្រុម Atletico Madrid នៅត្រឹមរដូវកាលនេះហើយ ក្រោយពីលោកដឹកនាំក្រុមមិនបានល្អទាល់តែសោះ។
ក្រុម AT Madrid បច្ចុប្បន្ននៅលេខ៤ក្នុងតារាង La Liga ហើយនៅគម្លាតពីក្រុមកំពូលតារាងជាង១០ពិន្ទុឯណោះ។ កត្ដានេះហើយ បានធ្វើឱ្យគេគិតថាក្រុមរបស់លោក Simeone នារដូវកាលនេះបានបរាជ័យទៅហើយមិនអាចឈ្នះពានរង្វាន់អ្វីមួយនោះទេ។ ជាក់ស្ដែងទាំង Copa del Rey និងពានរង្វាន់អឺរ៉ុបដទៃទៀតក៏ពួកគេបានធ្លាក់ចេញអស់ទៅហើយដែរ មិនមានការប្រកួតប្រជែងអ្វីទៀតឡើយ។ ដោយសារតែកត្ដានេះ ទើបមានសំនួរទៅកាន់កៅអីរបស់អ្នកចាត់ការសញ្ជាតិអាហ្សង់ទីននេះហើយ។
លោក Simeone បាននិយាយថា៖ “កុងត្រារបស់ខ្ញុំ អាស្រ័យទៅលើយើងបញ្ចប់រដូវកាលដោយរបៀបណា។ គ្រប់រដូវកាល យើងតែងតែពិនិត្យមើលអ្វីដែលយើងបានសម្រេចនៅចុងបញ្ចប់ ហើយបន្ដដោយរបៀបណា។ នៅឆ្នាំនេះ ពិតជាមិនអាចទទួលយកបានមែន។ យើងនឹងដឹងនៅពេលរដូវកាលបញ្ចប់”៕