ខ្សែប្រយុទ្ធ Ousmane Dembele បានរងរបួសទៅហើយកាលពីយប់មិញនេះ ហើយនឹងអាចសម្រាករហូតដល់ទៅ៣សប្ដាហ៍ឯណោះ។
នៅយប់មិញនេះ ក្រុម FC Barcelona បានយកឈ្នះទៅលើក្រុម Girona ក្នុងលទ្ធផល ១-០ ដើម្បីបន្ដឈរនៅកំពូលតារាង La Liga ។ តែយ៉ាងណាក្រុមអ្នកមានបុណ្យមួយនេះក៏បានបាត់បង់សមាជិកម្នាក់ទៅហើយដែរគឺ Dembele ដែលបានរងរបួសក្នុងការប្រកួតមួយនេះ។ កីឡាករបារាំង នឹងត្រូវអវត្តមានពីទីលានប្រមាណ៣សប្ដាហ៍ឯណោះ។ ដោយវាអាចនឹងមិនបានលេងទល់ Man Utd នៅជើងទី១ក្នុងពាន Europa League ។
តែនេះក៏ជាសំណាងវិញសម្រាប់ក្រុម Barcelona ផងដែរ។ នៅពេលអវត្ដមាន Dembele នេះ គឺខ្សែប្រយុទ្ធ Robert Lewandoski អស់បំរាមល្មមក្នុងការត្រលប់មកជួយក្លឹបវិញបាន។ Dembele ក្រោមការដឹកនាំរបស់លោក Xavi បានក្លាយជាកីឡាករសំខាន់មែនទែន រូបគេអាចលេងបានទាំងប្រយុទ្ធស្លាបទាំងសងខាង ដែលធ្វើឱ្យ Barcelona មានស្ថេរភាពយ៉ាងល្អ៕