កីឡាករខ្លះទម្រាំរកបានមួយគ្រាប់ៗ តឹងនោះតឹង ខ្លះអត់សំណាង ទោះប្រឹងស៊ុត ប្រឹងតែតប៉ុណ្ណា ក៏មិនអាចបញ្ចប់ទី ខុសអីតែគីឡូធ្ងន់ប៉ុន្មានរូបនេះ មិនត្រឹមតែរកបានមួយគ្រាប់ពីរ ឬហៀរចូល Hat-trick ប៉ុណ្ណោះទេ ផ្ទុយទៅវិញគឺអាចបន្ថែមដល់គ្រាប់បាល់ទី ៥ មុនបញ្ចប់ការប្រកួត។
CTS Sports ធ្វើការរំឭកលើកមកបង្ហាញ នូវកំណត់ត្រាចាយពេលខ្លីបំផុតរបស់កីឡាករទាំង ៥ ក្នុងការបញ្ចប់ទី ៥ គ្រាប់/ប្រកួត រាប់តែគ្រាប់បាល់នៅក្របខ័ណ្ឌអឺរ៉ុប មិនរាប់ចូលប្រកួតមិត្តភាព៖
៥) Kylian Mbappe
នៅជំនួបវគ្គ ៣២ ក្រុម ពានរង្វាន់ Coupe de France កាលពីដើមសប្តាហ៍ យុវជនឆ្នើមសញ្ជាតិបារាំង បានបង្កើតភាពភ្ញាក់ផ្អើល តាមរយៈការរកបាន ៥ គ្រាប់ នៅជ័យជម្នះ ៧-០ របស់ PSG ទៅលើក្លឹបមិនដែលស្គាល់ Pays de Cassel។
Mbappe ចាយពេលត្រឹម ៥០ នាទីប៉ុណ្ណោះ ដោយគ្រាប់បាល់ទីមួយរបស់គេ កើតឡើងនៅនាទី ២៩ ហើយបន្តធ្វើបាននៅនាទី ៣៥, ៤០, ៥៦ និង ៧៩។ ឃើញថាមួយគ្រាប់ៗរបស់កីឡាករវ័យ ២៤ ឆ្នាំ ហាក់ធ្វើបានធូរខ្សុយ ដោយមិនចាំបាច់ប្រឹងខ្លាំងនោះទេ ពោលប្រើតែបច្ចេកទេស រត់ចូលត្រូវកន្លែង ឆ្កឹះមួយជើងចូលៗ។
៤) Mirslav Klose
នៅការប្រកួតទល់ Bologna ដែលក្លឹប Lazio យកឈ្នះ ៦-០ កាលពីខែឧសភា ឆ្នាំ ២០១៣ គឺជាពេលចារកំណត់ត្រាថ្មីសន្លាងចេញពីថ្វីជើងកីឡាករសញ្ជាតិអាល្លឺម៉ង់ ដែលអាចរកបាន ៥ គ្រាប់/ប្រកួត ចាយពេលខ្លីត្រឹមតែ ៣៩ នាទីប៉ុណ្ណោះ។
ជាប់ជម្រើស ១១ នាក់ដំបូង កីឡាករលេងតំណែងប្រយុទ្ធ បើកឆាករកបានគ្រាប់បាល់ដំបូងនៅនាទី ២២ មុនចន្លោះឲ្យមិត្តរួមក្រុម Hernandes រកបានគ្រាប់បាល់ទីពីរនៅ ១០ នាទីបន្ទាប់។ តែចូលដល់គ្រាប់បាល់បន្តពីនាទី ៣៦ ដល់ ៦១ គឺសុទ្ធតែជាការស៊ុតរបស់ Klose ទាំងស្រុង មុនត្រូវបានអ្នកចាត់ការប្តូរចេញនៅនាទី ៦៨។
៣) Jermain Defoe
មុនការចូលនិវត្ត កីឡាករសញ្ជាតិអង់គ្លេសក៏បានបន្សល់ការចងចាំដ៏ល្អមួយ កើតឡើងនៅខែវិច្ឆិកា ឆ្នាំ ២០០៩ គ្រាក្លឹបមាន់ខ្នាយមាស Spurs យកឈ្នះទៅលើ Wigan Athletic ៩-១ នៅក្របខ័ណ្ឌ Premier League។ គ្រានោះខ្សែប្រយុទ្ធ Defoe បានបង្កើតឲ្យមានសំឡេងសាទរក្នុងកីឡដ្ឋាន នៅនាទី ៥១, ៥៤, ៥៨, ៦៩ និង ៨៧ មានន័យថា ចន្លោះពេលត្រឹម ៣៦ នាទី អាចរកបានដល់ទៅ ៥ គ្រាប់ឯណោះ។
២) Sergio Aguero
មកទល់ពេលនេះ មិនទាន់មាននរណាបំបែកកំណត់ត្រាគ្រាប់បាល់ ៥ គ្រាប់ ចាយពេលតិចបំផុតនៅ Premier League របស់កីឡាករអាហ្សង់ទីននៅឡើយ ក្រោយរក្សាទុកនឹងឈ្មោះរបស់គេ តាំងខែតុលា ឆ្នាំ ២០១៥។
នៅជ័យជម្នះ ៦-១ របស់សំពៅមាសទៅលើសេះសមុទ្រ Newcastle ក៏កើតមាន ៥ គ្រាប់ ជាចំណែករបស់ Aguero នៅនាទី ៤២,៤៩,៥០,៦០ និង ៦២ ពោលគឺត្រឹមពេល ២០ នាទីប៉ុណ្ណោះ។
១) Robert Lewandowski
ទោះជាយ៉ាងណា ៥ គ្រាប់របស់ Aguero មិនបានក្លាយជាកំណត់ត្រាប្រចាំតំបន់អឺរ៉ុបឡើយ ដ្បិតអីមុននោះពីរសប្តាហ៍ នៅឯក្របខ័ណ្ឌ Bundesliga គឺមានសមិទ្ធផលអស្ចារ្យជាងនោះទៅទៀត។
ធ្វើបានដោយខ្សែប្រយុទ្ធប៉ូឡូញ Robert Lewandowski នៅជំនួប Bayern វាយបកយកឈ្នះ ៥-១ ទៅលើ Wolfsburg។ ដើមឡើយនៅនាទី ២៦ ខាងក្លឹបភ្ញៀវបើកឆាកគ្រាប់បាល់មុន លុះចូលដល់តង់ទីពីរ ពេលកីឡាករជំនាញជើងស្តាំប្តូរចូល រាប់ពីនាទី ៥១, ៥២,៥៥,៥៧ និង ៦០ មិនដឹងជាខាង Wolfsburg ចាញ់ច្រាបអី ឬក៏ត្រូវបារមីជំនាងកីឡដ្ឋាន បែរជាបើកឲ្យ Lewandowski ស៊ុតចូលទីផុយៗ ត្រឹម ៩ នាទី អាចរកបានដល់ទៅ ៥ គ្រាប់។
មកទល់ពេលនេះ មិនទាន់មាននរណា អាចបំបែកកំណត់ត្រារបស់ Lewandowski បាននៅឡើយ។ បញ្ជាក់ថា បើយើងរាប់អ្នករកបានគ្រាប់បាល់ច្រើនជាង ៥/ប្រកួត គឺមានកីឡាករច្រើនទៀត ហើយបើរាប់ក្រៅលីគកំពូលអឺរ៉ុបផង តួយ៉ាងដូចកាល Julian Alvarez ធ្វើបាន ៦ គ្រាប់ឲ្យ River Plate និង Erling Haaland ធ្វើបាន ៩ គ្រាប់ឲ្យជម្រើសជាតិន័រវេសជាដើម៕
ប្រភព៖ បរទេស