លោក Pep Guardiola អ្នកចាត់ការក្រុម Manchester City ដឹងមុនទៅហើយថាលោក Mikel Arteta នឹងក្លាយជាអ្នកចាត់ការឆ្នើមម្នាក់ ព្រោះលោកពិតជាមានសមត្ថភាពល្អមែនទែន អំឡុងពេលធ្វើជាគ្រូជំនួសនៅក្នុងក្លឹប។
ក្រុម Man City នឹងត្រូវធ្វើការប្រកួតជាមួយក្រុម Arsenal ក្នុងពានរង្វាន់ FA Cup នៅម៉ោង៣ទៀបភ្លឺនេះហើយ។ មុនជំនួបគ្រូនិងសិស្សនេះដែរ អ្នកចាត់ការទាំងពីរបាននិយាយសរសើរគ្នាទៅវិញទៅមក ដោយក្នុងនោះលោក Pep អះអាងថាលោកមើលឃើញថាលោក Arteta នឹងក្លាយជាអ្នកចាត់ការល្អម្នាក់មិនខាន ក្រោយពីបានធ្វើការជាមួយគ្នានៅក្លឹប Man City ។ មួយវិញទៀត លោក Arteta នេះទៀតសោត ក៏នឹងក្លាយជាអ្នកជំនួសកៅអីលោក Pep នៅថ្ងៃណាមួយដែលលោក Pep ចេញផងដែរ។
តែដោយសារ Arteta ស្រលាញ់ក្លឹប Arsenal ខ្លាំង ទើបបានជាអ្នកចាត់ការរូបនេះសម្រេចចិត្តចាកចេញពីតំណែងគ្រូជំនួសនៅ Man City ទៅធ្វើជាអ្នកចាត់ការក្រុមកាំភ្លើងធំតែម្ដង។ បច្ចុប្បន្នការដឹកនាំរបស់លោកកំពុងតែល្អ ជួយ Arsenal ឈរកំពូលតារាង Premier League ដាច់ពិន្ទុក្រុម Man City ថែមទៀត៕