លោក Marcelo Bielsa កំពុងចរចាមកដឹកនាំក្រុម Everton ហើយ ក្រោយពីក្លឹបនៅអង់គ្លេសមួយនេះបានបណ្ដេញលោក Frank Lampard ចេញពីតំណែងកាលពីពេលថ្មីៗនេះ។
ក្លឹប Everton ក្រោមការដឹកនាំរបស់លោក Lampard បានធ្លាក់ដល់តំបន់កាត់ចោលទៅហើយនៅត្រឹមពាក់កណ្ដាលរដូវកាលនេះ។ ដូច្នេះហើយ ទើបបានជាក្លឹបមិនអាចទុកយូរទៀតទេ មានតែត្រូវដកអតីតកីឡាករ Chelsea នេះចេញ ហើយស្វែងរកអ្នកថ្មីមកជួយស្រោចស្រង់ក្លឹបវិញ។ ក្នុងនោះដែរ លោក Marcelo Bielsa ត្រូវបានគេចាត់ជាលេខ១តែម្ដងសម្រាប់តំណែងមួយនេះ។
ខណៈដែលយប់មិញនេះគេក៏បានប្រទះឃើញបុរសសញ្ជាតិអាហ្សង់ទីននេះ បានមកដល់អង់គ្លេសផងដែរ។ ការមកនេះ ក៏ដើម្បីចរចាគ្នាជាមួយក្រុម Everton ។ ប្រសិនបើលោកមកដឹកនាំ លោកក៏មានគោលដៅរបស់លោកដូចគ្នាក្នុងការកែប្រែស្ថានភាព ហើយថ្នាក់ដឹកនាំក្លឹបក៏ត្រូវធ្វើតាមដូចគ្នា៕