ខ្សែការពាររបស់ Paris Saint-Germain កីឡាករ Presnel Kimpembe បានអះអាងថាគាត់មិនត្រូវបានជូនដំណឹងអំពី Kylian Mbappe ជំនួសគាត់ជាអនុប្រធានក្រុមនោះទេ។
Mbappe ស៊ុតបញ្ចូលទីបាន ៥គ្រាប់ ខណៈដែល PSG បានយកឈ្នះលើក្រុមលីគទីប្រាំមួយ Pays de Cassel ក្នុងលទ្ធផល ៧-០ ក្នុងការប្រកួត Coupe de France កាលពីថ្ងៃច័ន្ទ ដោយតារាបារាំងរូបនេះបានពាក់ស្លាកប្រធានក្រុមក្នុងអំឡុងអវត្តមានកីឡាករ Marquinhos។
ក្រោយចប់ការប្រកួត លោក Christophe Galtier គ្រូបង្វឹក PSG បានប្រាប់អ្នកយកព័ត៌មានថា Mbappe ឥឡូវនេះជាអនុប្រធានក្រុមរបស់ពួកគេ។
Kimpembe ដែលមិនបានលេងតាំងពីខែវិច្ឆិកា ដោយសាររបួសកែងជើង ធ្លាប់ជាអនុប្រធានក្រុមរបស់ Marquinhos។
ពាក្យចចាមអារ៉ាមកាលពីថ្ងៃអង្គារបានលើកឡើងថា Kimpembe បានយល់ព្រមចុះចេញពីតំណែងដើម្បីអនុញ្ញាតឱ្យ Mbappe ឡើងកាន់តួនាទីជាអ្នកដឹកនាំក្រុម។
ទោះជាយ៉ាងណាក៏ដោយ គាត់ទទូចថារបាយការណ៍បែបនេះមិនត្រឹមត្រូវទេ ផ្ទុយទៅវិញគាត់បានចោទប្រកាន់ PSG ថាមិនបានជូនដំណឹងគាត់ទាល់តែសោះ។
គាត់បានសរសេរនៅលើគណនីប្រព័ន្ធផ្សព្វផ្សាយសង្គមផ្លូវការរបស់គាត់ថា៖
“ប៉ុន្មានម៉ោងចុងក្រោយនេះ ខ្ញុំអាចស្តាប់ និងបានអានព័ត៌មានជាច្រើនអំពីខ្លួនខ្ញុំ។ ដូច្នេះខ្ញុំសូមបញ្ជាក់ឲ្យច្បាស់ដើម្បីចៀសវាងការបន្តផ្សព្វផ្សាយព័ត៌មានមិនពិតក្នុងរឿងនេះ។ ខ្ញុំមិនបានដឹងអំពីការសម្រេចចិត្តនេះទេ នេះជាការមិនពិតទាំងស្រុង… និយាយថា ខ្ញុំនឹងគោរពការសម្រេចចិត្តរបស់ក្លឹបជានិច្ច”៕