Messi ​ស្ទាក់ស្ទើរ​ក្នុង​ការ​បន្ដ​កុងត្រា​នៅ​ក្លឹប PSG ​

​ខ្សែ​ប្រយុទ្ធ Lionel Messi ​ហាក់​ដូចជា​ស្ទាក់ស្ទើរ​ចិត្ត​ក្នុង​ការ​បន្ដ​កុងត្រា​នៅ​ក្លឹប PSG ​ទៅ​ហើយ ​ខណៈ​ដែល​កុងត្រា​របស់​គេ​នឹង​ផុត​កំណត់​នៅ​ត្រឹម​រដូវ​កាល​នេះ។

​ដំបូង​ឡើយ​ក្រោយ​ពី​ឈ្នះ​ពាន​រង្វាន់ FIFA World Cup 2022 ​ភ្លាម ​មាន​ដំណឹង​ថា Messi ​យល់​ព្រម​បន្ដ​កុងត្រា​ជាមួយ​ក្រុម PSG ​ទៀត​ទៅ​ហើយ។ តែ​ក្រោយ​ពី​ត្រលប់​ចូល​ហ្វឹកហាត់​ជាមួយ​ក្រុម​វិញ ​គ្រប់​យ៉ាង​បែរ​ជា​ក្រឡាប់​ចាក់​ទៅ​វិញ។ ​រហូត​មក​ដល់​ពេល​នេះ ​ការ​ចរចា​បន្ដ​កុងត្រា​នៅ​ជាប់​គាំង ​មិន​ទាន់​រក​ដំណោះស្រាយ​ចេញ​នោះ​ទេ។ ​Messi ​ចាប់​ផ្ដើម​មាន​អារម្មណ៍​ចង់​ចាកចេញ​ពី​បារាំង​វិញ ​ដោយ​ចង់​ស្វែង​រក​ឱកាស​ថ្មី ​ការ​ប្រកួត​ប្រជែង​ថ្មី​ទៀត។

​ខណៈ​ដែល​បច្ចុប្បន្ន​ក្លឹប​ជាច្រើន​ចង់​បាន​កីឡាករ​អាហ្សង់ទីន​រូប​នេះ ​ជា​ពិសេស​ក្លឹប​នៅ​អាមេរិក ​និង​អារ៉ាប់ប៊ីសាអូឌីត​តែ​ម្ដង។ ​កន្លង​មក ​បន្ទាប់​ពី Ronaldo ​ផ្លាស់​ទៅ​លេង​នៅ​អារ៉ាប់ប៊ីសាអូឌីត​ភ្លាម ក៏​មាន​ដំណឹង​ថា​ក្លឹប​ផ្សេង​ទៀត​ក្នុង​ប្រទេស​នេះ ​ក៏​ទាក់ទង Messi ​ដែរ ​ដោយ​ហ៊ាន​ផ្ដល់​តម្លៃ​ពលកម្ម​ដល់​ទៅ​៣០០​លាន​ដុល្លារ​ក្នុង​១​ឆ្នាំ​ឯ​ណោះ។ Ronaldo ​តម្លៃ​ពលកម្ម​របស់​គេ​នៅ​អារ៉ាប់ប៊ីសាអូឌីត ​បាន​ដល់​ទៅ ២១០​លាន​ដុល្លារ​ក្នុង​១​ឆ្នាំ៕

ភ្ជាប់ទំនាក់ទំនងជាមួយ CTS SPORT