នៅថ្ងៃទី២១ ខែមីនា ឆ្នាំ២០២៣ ដែលជាពេលវេលាដ៏ល្អគឺពេលព្រះអាទិត្យរះចំកណ្តាលកំពូលប្រាសាទអង្គរវត្ត នឹងមានប្រារព្ធព្រះរាជពិធីសុំភ្លើង ព្រះអគ្គីកីឡា ដោយព្រះករុណាព្រះបាទសម្តេចព្រះបរមនាថនរោត្តមសីហមុនី ព្រះមហាក្សត្រនៃកម្ពុជានឹងយាងជាព្រះរាជាធិបតីដ៏ខ្ពង់ខ្ពស់បំផុត។
អគ្គលេខាធិការ គណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានឱ្យដឹងថាពិធីរត់ភ្លើងគប់ក្នុងព្រឹត្តិការណ៍ ស៊ីហ្គេម ឆ្នាំ២០២៣ នៅកម្ពុជានឹងមានការចាប់អារម្មណ៍ខ្លាំងពីប្រជាពលរដ្ឋព្រោះមានការរៀបចំពិសេសៗជាច្រើន ក្នុងនោះក៏មានពិធីសុំភ្លើងពីព្រះនៅប្រាសាទអង្គរវត្តផងដែរ។ អ្វីដែលកាន់តែពិសេសទៀតនោះ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នឹងយាងជាព្រះរាជាធិបតីដ៏ខ្ពង់ខ្ពស់ក្នុងព្រះរាជពិធីសុំភ្លើង «ព្រះអគ្គីកីឡា» នៅប្រាសាទអង្គរវត្ត នាថ្ងៃទី២១ ខែមីនា ឆ្នាំ២០២៣ ខាងមុខនេះ ដើម្បីរៀបចំធ្វើជាភ្លើងគប់រត់នៅខេត្តសៀមរាប និងបណ្តាប្រទេសក្នុងតំបន់អាស៊ាន សម្រាប់ស៊ីហ្គេម លើកទី៣២ ឆ្នាំ២០២៣។
លោក វ៉ាត់ ចំរើន អគ្គលេខាធិការ គណៈកម្មាធិការជាតិ CAMSOC-CAMAPGOC បានលើកឡើងបន្ថែមថា៖ “ការរៀបចំព្រះរាជពិធីសុំភ្លើងព្រះអគ្គីកីឡានេះ នឹងត្រូវនៅថ្ងៃទី២១ ខែមីនា គឺចំពេលដែលព្រះអាទិត្យរះចំកណ្តាលកំពូលប្រាសាទអង្គរវត្តរបស់យើង អ៊ីចឹងយើងបានកំណត់ច្បាស់លាស់ ក្នុងការរៀបចំ ដោយលិខិត និងឯកសារនានា ដែលសម្របសម្រួល គឺសម្តេចតេជោនាយករដ្ឋមន្រ្តី បានឯកភាព ក្នុងការស្នើសុំព្រះរាជតំណាងដ៏ខ្ពង់ខ្ពស់របស់ព្រះករុណាជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា ព្រះអង្គប្រទាននូវភ្លើងព្រះអគ្គីកីឡានេះ”៕