សហព័ន្ធ​ប្រដាល់​គុន​ខ្មែរ ​បក​ស្រាយ​រឿង​ក្របខណ្ឌ ធឿន ធារ៉ា ​ច្បាស់​ៗ​ហើយ​

​ឯកឧត្តម​ ហេង សុខឃ​ន អគ្គលេខាធិការ​សហព័ន្ធ​កីឡាប្រដាល់​គុន​ខ្មែរបាន​បញ្ជាក់​ថា កីឡាករ ធឿន ធារ៉ា ​ត្រូវបាន​សហព័ន្ធ​កោះហៅ​ឲ្យ​ចូល​ជម្រើសជាតិ ​និង​សន្យា​ស្នើសុំ​ផ្ដល់​ក្របខ័ណ្ឌ​រដ្ឋ​ជូន​តាំង​ពី​ឆ្នាំ​២០១៧ តែ​ត្រូវបាន​សាមីខ្លួន និង​ក្លិប​បដិសេធ។

​សហព័ន្ធ​កីឡា​ប្រដាល់​គុន​ខ្មែរ​បាន​​ធ្វើ​សន្និសីទ​សារព័ត៌មាន​មួយកាលពី​ថ្ងៃទី​០៤ ខែមករា ឆ្នាំ​២០២៣ បន្ទាប់ពី​មាន​ចម្ងល់​ជាច្រើន​ពី​មហាជនរហូត​មានការ​ទទូច​ឲ្យ​មានការ​ផ្ដល់​ក្របខ័ណ្ឌ​ដល់​កីឡាករ ធឿន ធារ៉ា ​ក្រោយ​ពី​គេ​ឈ្នះ​ខ្សែ​ក្រវ៉ាត់ Thai Fight ។ ​ចំពោះ​រឿង​នេះ ​ឯកឧត្តម ហេង សុខឃ​ន អគ្គ​លេខា​ធិការ​សហព័ន្ធ​កីឡាប្រដាល់​គុន​ខ្មែរបាន​បញ្ជាក់ថា​រឿង​ផ្ដល់​ក្របខ័ណ្ឌ និង​ការបញ្ចូល​ជម្រើសជាតិ​នេះ ថ្នាក់ដឹកនាំ​សហព័ន្ធ ក្រោម​​ការដឹកនាំ​របស់​ឯកឧត្តម តែម ម៉ឺន បាន​គិតគូរ​តាំងពី​ឆ្នាំ​២០១៧ មកម្ល៉េះ កំឡុងពេល ធឿន ធារ៉ា ចូលរួម​ប្រកួត​ជើងឯក​ថ្នាក់ជាតិនៅ​តំបន់​អភិវឌ្ឍន៍​ 7NG ​តែ ធារ៉ា មិនបាន​សម្រេចចិត្ត​ឡើយ ដោយ​ទុក​ឱកាស​នេះ​ឲ្យ​ក្លិប​របស់ខ្លួនគឺ​ក្លិប​ប្រដាល់​គុន​ខ្មែរ អេ ភូ​ថង ជា​អ្នកសម្រេច តែ​ត្រូវបាន​ប្រធាន​ក្លិបគឺ​លោក អេ ភូ​ថង បដិសេធ​ម្ដង​ហើយ​ម្ដងទៀត ទោះបី​សហព័ន្ធ​បាន​ព្យាយាម​ស្នើសុំ​ជាច្រើន​ដង​ក៏ដោយ។​

ឈាន​ដល់​ដើម​ឆ្នាំ​ ២០២២​ សហព័ន្ធ​បាន​ជួប​ចរចា​ជា​ថ្មី​ទៀត​ដើម្បី​យក​ ធឿន​ ធារ៉ា​ ចូល​ជម្រើស​ជាតិ​ និង​ស្នើសុំ​ផ្ដល់​ក្របខ័ណ្ឌ​ជា​ថ្មី​ ប៉ុន្តែ​នៅ​តែ​បរាជ័យ។​ ដែល​ការ​ទទួច​ចង់​ហៅ​ ធឿន​ ធារ៉ា​ មក​នេះ​ដោយ​សារ​តែ​ស្ដាយ​សមត្ថភាព​ ទេពកោសល​ និង​កាយសម្បទា​ ពិសេស​ប្រកួត​តំណាង​កម្ពុជា​នៅ​ស៊ីហ្គេម​ លើក​ទី៣២​ អំឡុង​ខែ​ឧសភា ខាង​មុខ។

សូម​បញ្ជាក់​ថា​ ធឿន ធារ៉ា បាន​សាង​កំណត់ត្រា​ថ្មីក្រោយ​ផ្ដួល​ជើង​ខ្លាំង​ថៃ សៃ​យុគ ដើម្បី​គ្រង​ខ្សែក្រវាត់ និង​ពានរង្វាន់​ព្រះមហាក្សត្រ​ថៃក្នុង​ព្រឹត្តិការណ៍​ Thai Fight ​កាលពី​ថ្ងៃទី​២៤ ខែធ្នូ ឆ្នាំ​២០២២។ ជោគជ័យ​នេះត្រូវបាន​សាទររហូត​មាន​ថ្នាក់ដឹកនាំ វិស័យ​ឯកជន និង​សប្បុរសជន​ជាច្រើន​ធ្វើការ​ឧបត្ថម្ភ​រូបគេ។​

ភ្ជាប់ទំនាក់ទំនងជាមួយ CTS SPORT