លោក Keisuke Honda អ្នកចាត់ការក្រុមជម្រើសជាតិកម្ពុជា បាននិយាយផ្ដាំទៅកីឡាករគ្រប់គ្នាថាលោកចង់ឃើញក្រុមគោព្រៃកម្ពុជានេះ មានឱកាសបានទៅលេងនៅ FIFA World Cup នៅឆ្នាំណាមួយ មុនពេលលោកលាចាកលោកនេះទៅ។
Honda បានចប់ភារកិច្ចក្នុងការដឹកនាំក្រុមជម្រើសជាតិឈុតធំរបស់កម្ពុជាហើយក្នុងប្រកួតចុងក្រោយជាមួយជម្រើសជាតិថៃកាលពីពេលថ្មីៗនេះ។ យ៉ាងណាមិញ លោកនៅមានភារកិច្ចចុងក្រោយមួយទៀតជាមួយក្រុមយុវជន U23 របស់កម្ពុជាក្នុងព្រឹត្តិការណ៍ស៊ីហ្គេម២០២៣នេះ។ ដោយការប្រមូលផ្ដុំហ្វឹកហាត់នឹងចាប់ផ្ដើមនៅខែកុម្ភៈខាងមុខនេះហើយ មុនដល់ការប្រកួតនៅឧសភាឆ្នាំ២០២៣ដែលជាខែចាប់ផ្ដើមការប្រកួតស៊ីហ្គេម។
ដើម្បីជាការលាកីឡាករក្នុងឈុតធំ Honda បាននិយាយពាក្យក្នុងចិត្តជាច្រើនចំពោះការបានមកធ្វើការជាមួយគ្នាតាំងពីឆ្នាំ២០១៨មកនេះ។ តែមួយឃ្លាដែលស្ដាប់ហើយមានន័យជាងគេនោះគឺ លោកចង់ឃើញក្រុមជម្រើសជាតិកម្ពុជាមានឱកាសបានលេង World Cup ឱ្យបានមុនពេលលោកលាចាកលោកនេះទៅ។ ការបានមកដឹកនាំជម្រើសជាតិកម្ពុជា ក៏ជាមោទកភាពសម្រាប់លោកផងដែរ៕