អ្នកគាំទ្រនៅប្រទេសថៃមានការកោតសរសើរជាខ្លាំង ចំពោះសមត្ថភាពកីឡាករកម្ពុជា ធឿន ធារ៉ា ដែលយកឈ្នះលើជើងខ្លាំងថៃ សៃយុគ បាន ដោយត្រូវអាជ្ញាកណ្ដាលបញ្ឈប់នៅត្រឹមទឹកទី១។
នេះជាប្រវត្តិសាស្ត្រប្រដាល់កម្ពុជាមួយទៀតហើយនៅលើឆាកអន្ដរជាតិ ក្រោយពីកីឡាករ ធឿន ធារ៉ា បានយកឈ្នះទៅលើសៃយុគ ជើងខ្លាំងរបស់ប្រទេសថៃនៅសង្វៀន Thai Fight កាលពីយប់មិញនេះ។ គ្រាន់តែចាប់ផ្ដើមការប្រកួតភ្លាម ធារ៉ា មិនបង្អង់យូរឡើយ ដោយដើរសម្រុកទៅភាគីថៃតែម្ដង។ កូនអ្នកព្រៃវែង រូបនេះជឿជាក់លើសមត្ថភាពខ្លួនមែនទែន ដោយសម្រុកមិនដកដៃឡើយ ហើយក៏បានបោះកែងបណ្ដាលឱ្យសៃយុគ បែកឈាមផងដែរ។
ដោយសារតែបែកធំពេក ក្រុមគ្រូពេទ្យក៏បានបញ្ឈប់ការប្រកួតនេះតែម្ដង ហើយលទ្ធផលវិញកីឡាករកម្ពុជា ធឿន ធារ៉ា ឈ្នះសៃយុគ នៅទឹក១ និងទទួលបានខ្សែក្រវ់ាត់ ក៏ដូចជាពានស្ដេចថៃមកកម្ពុជាផងដែរ។ នេះជាប្រវត្តិសាស្ដ្រខ្មែរហើយ ដែលកីឡាករកម្ពុជាអាចយកខ្សែក្រវ៉ាត់ Thai Fight មកស្រុកវិញបាន ហើយនេះក៏ជាខ្សែក្រវ៉ាត់ទី១របស់ ធារ៉ា ផងដែរ៕