ការរៀបចំការប្រកួតកីឡាទោចក្រយាន ជ្រើសរើសជើងឯកថ្នាក់ជាតិ ប្រចាំឆ្នាំ២០២២ ទាំងវិញ្ញាសាកង់គួក និងកង់ភ្នំ គឺជាការវាស់ស្ទង់គុណភាពបច្ចេកទេសកម្រិតខ្ពស់បំផុតកម្រិតជាតិ និងចុងក្រោយគេ បង្អស់ មុនពេលឈានដល់ការទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។ នេះ ការបញ្ជាក់របស់លោក នូ ចំរើន អគ្គលេខាធិការសហព័ន្ធខ្មែរកីឡាចក្រយាន ក្រោយបញ្ចប់សន្និសីទសារព័ត៌មាន កាលពីល្ងាចថ្ងៃទី១៩ ខែធ្នូ ឆ្នាំ២០២២ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC)។
លោក នូ ចំរើន លើកឡើងបន្ថែមថា មន្ត្រីបច្ចេកទេសកំពុងខិតខំរៀបចំយ៉ាងយកចិត្តទុកដាក់ខ្ពស់ សម្រាប់ការប្រកួតកម្រិតខ្ពស់បំផុតថ្នាក់ជាតិ ឆ្នាំ២០២២នេះ ក្រោមការចង្អុលបង្ហាញពីឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន ដើម្បីគោលដៅចម្បងឆ្ពោះទៅទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។
«ការរៀបចំពីមួយឆ្នាំទៅមួយឆ្នាំ ប៉ុន្មានឆ្នាំចុងក្រោយនេះ គឺជាការពង្រឹងការអភិវឌ្ឍបន្តិចម្តងៗ ឆ្ពោះទៅធ្វើម្ចាស់ផ្ទះ ស៊ីហ្គេម ២០២៣។ ជាមួយនឹងការជួយឧត្ថម្ភថវិកា ៤២,៧៥០ដុល្លារ ពីក្រុមហ៊ុន Herbalife សម្រាប់ចំណាយលើការរៀបចំការប្រកួត ឆ្នាំ២០២២នេះ គឺដើម្បីឲ្យស្របទៅតាមលក្ខណៈស្តង់ដារការប្រកួត ខណៈប្រាក់រង្វាន់ជ័យលាភី នឹងត្រូវបង្កើនច្រើនជាងការប្រកួតឆ្នាំមុនៗ ដូចគ្នាផងដែរ»។ លោកបានបន្ថែម។
ក្រៅពីការប្រកួតជើងឯកថ្នាក់ជាតិនេះ សហព័ន្ធក៏មានផែនការរៀបចំការប្រកួតត្រៀមមុន (Pre-Sea games) មួយព្រឹត្តិការណ៍ទៀត មុនដល់ស៊ីហ្គេម ២០២៣ ដោយត្រៀមធ្វើក្នុងខែកុម្ភៈ ឆ្នាំ២០២៣ និងការចូលរួមប្រកួតសាកល្បងពីបណ្តាប្រទេសមួយចំនួន ក្នុងអាស៊ាន ដើម្បីស្គាល់ពីស្ថានភាពផ្លូវ មុនពេលស៊ីហ្គេម មកដល់។ ក្នុងឱកាសប្រកួតត្រៀមនេះ អ្នកជំនាញមកពីប្រទេសកូរ៉េ នឹងជួយបណ្តុះបណ្តាលក្នុងពេលបោះជំរំហ្វឹកហាត់របស់កីឡាករ និងគ្រូបង្វឹក ដល់ក្រុមកង់មកពីប្រទេសកំពុងអភិវឌ្ឍដូចជា ទីម័រខាងកើត ឡាវ មីយ៉ាន់ម៉ា និងម្ចាស់ផ្ទះកម្ពុជា៕