ក្លឹប Al Nassr របស់ប្រទេសអារ៉ាប់ប៊ីសាអូឌីត មានគម្រោងចុះកុងត្រាជាមួយខ្សែប្រយុទ្ធ Cristiano Ronaldo ឱ្យបានរួចរាល់នៅត្រឹមចុងឆ្នាំ២០២២នេះតែម្ដង។
ប្រភពនៅអេស្ប៉ាញបានអះអាងថានៅពេលនេះ Ronaldo កំពុងស្ថិតនៅឌូបៃ ហើយនឹងបន្ដហោះទៅអារ៉ាប់ប៊ីសាអូឌីតតែម្ដង ដើម្បីចុះកុងត្រាជាមួយក្លឹបអ្នកមាន Al Nassr រហូតដល់ឆ្នាំ២០២៥។ ខណៈដែលការចរចាទំនងជាបានត្រូវគ្នាអស់ទៅហើយ ព្រោះភាគីទាំងសងខាងបានជួបពិភាក្សាគ្នាតាំងពី Ronaldo និង Man Utd ប្រកាសចែកផ្លូវគ្នាមក មុនព្រឹត្តិការណ៍ FIFA World Cup 2022 ម្ល៉េះ។
ប្រសិនបើ Ronaldo ពិតជាចុះកុងត្រាលេងឱ្យក្លឹប Al Nassr មែន នោះកីឡាករវ័យ៣៧ឆ្នាំនេះនឹងទទួលបានតម្លៃពលកម្មដល់ទៅ២០០លានអឺរ៉ូឯណោះក្នុង១ឆ្នាំ ដោយចំនួនដ៏ច្រើននេះបូកទាំងប្រាក់ឈ្នូលបានពីលេងឱ្យក្លឹប និងពាណិជ្ជកម្មនានាទៀត៕