ក្រុមបាល់ទាត់ជម្រើសជាតិប្រេស៊ីលនៅតែរក្សាចំណាត់ថ្នាក់លេខ១នៅលើលោកក្នុង FIFA Ranking ដដែល បើទោះជាពួកគេបានធ្លាក់ពី World Cup ត្រឹមវគ្គ៨ក្រុមក៏ដោយ។
ប្រេស៊ីលបានឡើងទៅលេខ១លើលោកតាំងពីខែកុម្ភៈដើមឆ្នាំ២០២២មកម្ល៉េះ ហើយបើទោះជាពួកគេធ្វើមិនបានល្អនៅ Copa America ហើយនិងនៅ World Cup ទៀតក៏មិនបានធ្វើឱ្យចំណាត់ថ្នាក់ Ranking របស់ពួកគេធ្លាក់ចុះផងដែរ។ ដោយឡែកអាហ្សង់ទីនដែលធ្វើបានល្អទាំងនៅ Copa America និងលើកពាន World Cup ថែមទៀតក៏នៅតែមិនទាន់មានពិន្ទុគ្រប់គ្រន់ក្នុងការទម្លាក់ប្រេស៊ីលពីលេខ១នៅ FIFA Ranking ដែរ។
យ៉ាងណាមិញការមិនអាចទាញប្រេស៊ីលឱ្យធ្លាក់ពីលេខ១នេះ ក៏ព្រោះតែក្រុមអាហ្សង់ទីនមិនអាចយកឈ្នះលើក្រុមបារាំងបាននៅត្រឹម១២០នាទី។ ការលេងដល់វគ្គប៉េណាល់ទីកាត់សេចក្ដីគឺបានធ្វើឱ្យពិន្ទុរបស់ក្រុមអាហ្សង់ទីនទទួលមិនបានច្រើននោះទេ។ នៅ FIFA Ranking បច្ចុប្បន្ននេះ ប្រេស៊ីលលេខ១ អាហ្សង់ទីន លេខ២ និងបារាំងលេខ៣៕