អ្នកចាំទី Emi Martinez របស់ក្រុមជម្រើសជាតិអាហ្សង់ទីន បានហៅខ្សែប្រយុទ្ធ Kylian Mbappe ថាមិនទាន់ស្គាល់បាល់ទាត់ច្បាស់នោះទេ បន្ទាប់ពីកីឡាករបារាំងរូបនេះបោះសម្ដីមើលស្រាលក្រុមនៅអាមេរិកឡាទីន។
កាលពីដើមឆ្នាំកន្លងទៅ Mbappe បាននិយាយថាក្រុមនៅអឺរ៉ុបបានរៀបចំនិងត្រៀមខ្លួនក្នុងការប្រកួត World Cup បានល្អជាងក្រុមនៅឡាទីន ព្រោះពួកគេមានការប្រកួតកម្រិតខ្ពស់បានច្រើនជាង។ ខណៈដែលក្រុមនៅឡាទីនដូចជាអាហ្សង់ទីន និងប្រេស៊ីល មិនសូវបានជួបក្រុមខ្លាំងច្រើននោះទេ មុនការប្រកួត World Cup ឈានចូលមកដល់។
ចំពោះសម្ដីខាងលើត្រូវបានអ្នកកាសែតលើកមកម្ដងទៀត មុនការប្រកួតរវាងក្រុមបារាំង និងអាហ្សង់ទីនក្នុងវគ្គផ្ដាច់ព្រ័ត្រ World Cup នៅឆ្នាំ២០២២នេះ។ ក្នុងនោះ Martinez អ្នកចាំទីរបស់អាហ្សង់ទីន បានឆ្លើយតបថា៖ “គាត់មិនទាន់ស្គាល់បាល់ទាត់ច្បាស់នោះទេ។ គាត់មិនដែលលេងនៅអាមេរិកខាងត្បូងឡើយ។ នៅពេលអ្នកមិនធ្លាប់មានបទពិសោធលេងទីនោះ វាល្អប្រសើរ ប្រសិនបើអ្នកមិននិយាយពីវា។ ប៉ុន្តែមិនជាបញ្ហានោះទេ យើងជាក្រុមល្អដូចដែលគ្រប់គ្នាបានឃើញហើយ”៕