ខ្សែបម្រើ Luka Modric បានអះអាងថារូបគេនឹងបន្ដលេងឱ្យក្រុមជម្រើសជាតិក្រូអាតដល់ការប្រកួតពានរង្វាន់ UEFA Nations League នៅឆ្នាំក្រោយ។
Modric ប្រធានក្រុមរបស់ក្រូអាត បានជួយសមាជិកក្រុមជោគជ័យមែនទែននៅព្រឹត្ដិការណ៍ World Cup ២សម័យកាលចុងក្រោយមកនេះ។ ជាក់ស្ដែងនៅឆ្នាំ២០១៨កន្លងទៅ ពួកគេទទួលបានចំណាត់ថ្នាក់លេខ២ ដោយចាញ់បារាំងនៅវគ្គផ្ដាច់ព្រ័ត្រ។ ស្របពេលនៅ World Cup 2022 នេះទៀត Modric ក៏នៅតែធ្វើបានល្អ និងជួយក្រូអាតទទួលបានចំណាត់ថ្នាក់លេខ៣ទៀត បើទោះជាមតិជាច្រើនបានមើលរំលងក្រុមនេះកាលពីមុនចាប់ផ្ដើមការប្រកួតក៏ដោយ។
ចំពោះរឿងចូលនិវត្តន៍ពីជម្រើសជាតិវិញ កីឡាករលេងនៅក្លឹបអាជីព Real Madrid បានអះអាងថាបែបនេះថា៖ “វាប្រហែលជា World Cup ចុងក្រោយរបស់ខ្ញុំហើយ ប៉ុន្តែខ្ញុំមិនអាចនិយាយអ្វីច្រើនទេ។ ខ្ញុំសប្បាយចិត្តចំពោះអាជីពលេងឱ្យក្រូអាត ឈ្នះមេដាយបាន២ដងពិតជាសំខាន់ណាស់។ ក្ដីសុបិនរបស់ខ្ញុំគឺឈ្នះពាននេះ ប៉ុន្តែមិនអាចកើតឡើង ប៉ុន្តែខ្ញុំក៏សប្បាយចិត្តដែរមកដល់ពេលនេះ។ ខ្ញុំចង់បន្ដរហូតដល់ Nations League ហើយយើងនឹងឃើញអ្វីកើតឡើងក្រោយពីនោះ”៕