នៅរាត្រីនេះ ការប្រកួតពានរង្វាន់ FIFA World Cup 2022 បានឈានដល់វគ្គផ្ដាច់ព្រ័ត្រហើយ រវាងក្រុមបាល់ទាត់ជម្រើសជាតិបារាំង តតាំងជាមួយក្រុមបាល់ទាត់ជម្រើសជាតិអាហ្សង់ទីន។
បារាំង ជាក្រុមការពារតំណែងជើងឯកពានរង្វាន់ World Cup នេះ ហើយមកដល់វគ្គផ្ដាច់ព្រ័ត្រនេះ ពួកគេក៏បានយកឈ្នះលើក្រុមខ្លាំងៗជាច្រើនផងដែរ។ តែមុនការប្រកួតចាប់ផ្ដើមនៅរាត្រីនេះ បារាំងកំពុងមានបញ្ហាកីឡាកររបួសច្រើនបន្ដិចហើយ ក្រោយពីមានការឆ្លងជំងឺផ្ដាសាយក្នុងជំរុំហ្វឹកហាត់របស់ប្រទេសនេះ។ កីឡាករ៤ទៅ៥នាក់ហើយដែលកំពុងអស់កម្លាំងនិងមានអាការផ្ដាសាយ ដែលទំនងជាមិនអាចលេងទល់ក្រុមអាហ្សង់ទីនបាននោះទេ។
ស្របពេលខាងអាហ្សង់ទីនវិញ ពួកគេរំពឹងថាត្រូវយកពានរង្វាន់ World Cup នេះដើម្បីជាការជូនដំណើរ Messi ចូលនិវត្តន៍ពីក្រុមជម្រើសជាតិ។ ខ្សែប្រយុទ្ធវ័យ៣៥ឆ្នាំបានអះអាងថានៅរាត្រីនេះជាការប្រកួត World Cup ចុងក្រោយរបស់គេហើយ។ ដូច្នេះទើបបានជាអាហ្សង់ទីនរំពឹងថានឹងទទួលបានជ័យជម្នះនៅរាត្រីនេះ។ ខណៈដែលប្រទេសអាហ្សង់ទីនផ្ទាល់ ខកខានលើកពាន World Cup តាំងពីឆ្នាំ១៩៨៦មកហើយ៕