លោក Walid Regragui គ្រូបង្វឹកក្រុមជម្រើសជាតិម៉ារុកបានចាត់ទុកការប្រកួតយកចំណាត់ថ្នាក់លេខ៣នៅព្រឹត្តិការណ៍ FIFA World Cup នេះជាការប្រកួតដ៏អាក្រក់មួយ។
ម៉ារុក នឹងត្រូវតតាំងជាមួយក្រុមក្រូអាតដើម្បីបណ្ដើមយកចំណាត់ថ្នាក់លេខ៣នៃពានរង្វាន់ FIFA World Cup 2022 នេះនៅវេលាម៉ោង១០យប់។ ជំនួបនេះដែរ គឺជាការប៉ះគ្នាលើកទី២ហើយសម្រាប់ក្រុមទាំងពីរ ក្រោយពីពួកគេស្ថិតក្នុងពូលជាមួយគ្នាកន្លងទៅ និងបញ្ចប់ការប្រកួតនោះលទ្ធផលស្មើគ្នា ០-០ ។ យ៉ាងណាមិញ ជំនួបយកលេខ៣នេះដែរ ត្រូវបានលោក Walid Regragui ចាត់ទុកថាមិនមែនជាការប្រកួតល្អនោះទេ។
លោក Walid Regragui បាននិយាយថា៖ “លេខ៣គឺជាការប្រកួតអាក្រក់មួយ។ យើងអស់សង្ឃឹមដែលយើងមិនអាចលេងវគ្គផ្ដាច់ព្រ័ត្រមែនទែនបាន។ សូម្បីតែលេងយកលេខ៣ក៏ពិបាកដែរ ព្រោះយើងទើបតែបរាជ័យនិងវានៅចង់ចាំក្នុងខួរក្បាលកីឡាករនៅឡើយ។ ខណៈដែលកាយសម្បទាវិញក៏មិនល្អថែមទៀត ព្រោះយើងលេង២ថ្ងៃមុន។ ការលេងយកលេខ៣ពិតជាធ្វើឱ្យខ្ញុំមានអារម្មណ៍រំខានណាស់។ យើងចាញ់វគ្គពាក់កណ្ដាលផ្ដាច់ព្រ័ត្រ ហើយមកត្រូវលេងយកលេខ៣ទៀត។ នៅទីបញ្ចប់ អ្នកនឹងចង់ចាំត្រឹមអ្នកមិនអាចឡើងទៅវគ្គផ្ដាច់ព្រ័ត្រប៉ុណ្ណោះ។ ហើយប្រសិនបើអ្នកឡើងទៅវគ្គផ្ដាច់ព្រ័ត្រ ហើយអ្នកចាញ់…ខ្ញុំនៅតែនិយាយដដែល បានលេខ២ គឺគ្រប់គ្នាចង់ចាំតែអ្នកឈ្នះពានទេ”៕