ក្រុមបាល់ទាត់ជម្រើសជាតិបារាំង កំពុងមានបញ្ហាកីឡាករឆ្លងជំងឺច្រើនមែនទែន ជាក់ស្ដែងនៅពេលនេះខ្សែការពារ Raphael Varane និង Ibrahima Konate ឈឺដែរហើយ។
ខ្សែការពារទាំងពីរនាក់ខាងលើបានក្លាយជាកីឡាករសំខាន់មែនទែនសម្រាប់ក្រុមបារាំងក្នុងការប្រកួតពានរង្វាន់ FIFA World Cup 2022 នេះ។ តែយ៉ាងណានៅពេលនេះពួកគេទំនងជាពិបាកក្នុងការលេងនៅវគ្គផ្ដាច់ព្រ័ត្រទល់ក្រុមអាហ្សង់ទីនហើយ ក្រោយពីមានបញ្ហាឆ្លងជំងឺ។ កាលពីថ្ងៃសុក្រកន្លងទៅ Raphael Varane និង Ibrahima Konate សុទ្ធតែផ្ដាយសាយទាំងពីរ ហើយបច្ចុប្បន្នកំពុងដាក់នៅដោយឡែកពីគេហើយ។
ដោយនេះជាសញ្ញាមិនល្អឡើយសម្រាប់ក្រុមជម្រើសជាតិបារាំង ព្រោះកន្លងមកកីឡាករ២នាក់ក៏បានឆ្លងមេរោគផ្ដាសាយផងដែរគឺ Dayot Upamecano និង Adrien Rabiot ដែលមិនទាន់ជាសះស្បើយស្រួលបួលផង។ នៅពេលនេះក៏ស្រាប់តែមានខ្សែការពារ២នាក់ទៀត បានឆ្លងមេរោគទៀតទៅហើយ។ ប្រសិនបើកីឡាករទាំង៤នាក់នេះ មិនប្រសើរទេ នោះបារាំងនឹងត្រូវលេងទល់អាហ្សង់ទីនដោយគ្មានវត្ដមានជម្រើសដំបូងដល់ទៅ៤នាក់ឯណោះ៕