ក្រុមបាល់ទាត់ជម្រើសជាតិក្រូអាត នឹងត្រូវប្រកួតជាមួយក្រុមបាល់ទាត់ជម្រើសជាតិម៉ារុកនៅម៉ោង១០យប់នេះហើយ ក្នុងការដណ្ដើមយកលេខ៣ ពានរង្វាន់ FIFA World Cup 2022 ។
ក្រូអាតដែលជាជើងឯករងកាលពី World Cup 2018 នៅតែធ្វើបានល្អទៀតនៅ World Cup 2022 នេះ ដោយអាចឡើងដល់វគ្គពាក់កណ្ដាលផ្ដាច់ព្រ័ត្របាន។ ក្រុមដឹកនាំដោយលោក Dalic មួយនេះ បានបរាជ័យក្រោមថ្វីជើងក្រុមអាហ្សង់ទីន ៣-០ កាលពីវគ្គពាក់កណ្ដាលផ្ដាច់ព្រ័ត្រកន្លងទៅ។ ដូច្នេះហើយ ទើបបានជាពួកគេធ្លាក់មកលេងដណ្ដើមយកលេខ៣នៅរាត្រីនេះវិញជាមួយក្រុមម៉ារុក។
ងាកទៅមើលក្រុមម៉ារុកវិញក៏មិនធម្មតាផងដែរ។ ប្រទេសនៅអាហ្វ្រិកមួយនេះ ធ្វើបានល្អណាស់ក្នុងការប្រកួត World Cup ឆ្នាំនេះ ដោយក្លាយជាប្រទេសដំបូងគេនៅអាហ្វ្រិកដែលបានឡើងដល់វគ្គពាក់កណ្ដាលផ្ដាច់ព្រ័ត្របាន។ តែគួរឱ្យសោកស្ដាយកាលពីប៉ះក្រុមបារាំងកន្លងទៅ ពួកគេបានបរាជ័យក្នុងលទ្ធផល ២-០ ទៅហើយ។ យ៉ាងណាមិញ ម៉ារុកឈានដល់វគ្គនេះ គឺជាជោគជ័យធំធេងបំផុតទៅហើយសម្រាប់ប្រទេសរបស់ពួកគេ។ ហើយប្រសិនបើរាត្រីនេះ បានឈ្នះក្រូអាតទៀតនោះ នឹងធ្វើឱ្យអ្នកគាំទ្រកាន់តែមានមោទកភាពចំពោះក្រុមមួយនេះថែមទៀត៕