ខ្សែការពារ Theo Hernandez បានបញ្ជាក់ថាក្រុមជម្រើសជាតិបារាំង មិនខ្លាចចំពោះវត្តមានរបស់ខ្សែប្រយុទ្ធ Lionel Messi ក្នុងការប្រកួតវគ្គផ្ដាច់ព្រ័ត្រពាន FIFA World Cup 2022 ខាងមុខនេះទេ។
បារាំង បានឡើងទៅវគ្គផ្ដាច់ព្រ័ត្រពាន World Cup ជាមួយក្រុមអាហ្សង់ទីនហើយ ក្រោយពីពួកគេបានយកឈ្នះទៅលើក្រុមម៉ារុកក្នុងលទ្ធផល ២-០ នៅយប់មិញនេះ។ ខណៈដែលក្រុមការពារតំណែងជើងឯកនេះ ពិតជាបង្កភាពភ្ញាក់ផ្អើលខ្លាំងមែនទែន ដែលអាចយកឈ្នះនិងស៊ុតក្រុមខ្លាំងការពារម៉ារុកបានដល់ទៅ២គ្រាប់បែបនេះ។ ខណៈដែលពួកគេនឹងត្រូវមានភារកិច្ចធំមួយទៀតនៅថ្ងៃទី ១៨ខែធ្នូឆ្នាំ២០២២ខាងមុខ តតាំងជាមួយក្រុមអាហ្សង់ទីន។
បើតាម Theo ដែលជាអ្នករកបាន១គ្រាប់ដែរទល់ក្រុមម៉ារុក និយាយថា៖ “បានលេង World Cup ២ដងជាប់គ្នាគឺជារឿងអស្ចារ្យបំផុត។ យើងពិតជាធ្វើបានល្អ គ្រប់ប្រកួតសុទ្ធតែលំបាក ប៉ុន្តែយើងបានធ្វើវារហូតដល់វគ្គផ្ដាច់ព្រ័ត្រ។ យើងនឹងប្រឹងប្រែងកាន់តែខ្លាំងដើម្បីឈ្នះនៅផ្ដាច់ព្រ័ត្រនេះ។ ក្រុមយើងនឹងសម្រាកឱ្យបានល្អដើម្បីត្រៀមប៉ះអាហ្សង់ទីន។ Lionel Messi មិនបានធ្វើឱ្យយើងខ្លាចគេនោះទេ យើងដឹងថាអាហ្សង់ទីនជាក្រុមខ្លាំង ប៉ុន្តែយើងក៏មានពេលគ្រប់គ្រាន់សម្រាប់ត្រៀមខ្លួនផងដែរ”៕