ខ្សែការពារ Raphael Varane បានអះអាងថាក្រុមបារាំង នឹងមិនធ្លាក់ចូលអន្ទាក់របស់ក្រុមម៉ារុកឡើយនៅរាត្រីនេះ ព្រោះពួកគេមានបទពិសោធគ្រប់គ្រាន់ក្នុងការប្រកួតក្នុងព្រឹត្តិការណ៍ធំៗបែបនេះ។
ក្រុមការពារតំណែងជើងឯកបារាំង នឹងត្រូវតតាំងជាមួយក្រុមម៉ារុកក្នុងការប្រកួតវគ្គពាក់កណ្ដាលផ្ដាច់ព្រ័ត្រ FIFA World Cup 2022 នៅម៉ោង២រំលងអាធ្រាត្រនេះ។ ជំនួបដ៏ក្ដៅគគុកនេះដែរ ក្រុមបារាំងហាក់មានប្រៀបជាងបន្ដិចទាំង FIFA Ranking និងកីឡាករម្នាក់ៗ ព្រោះបារាំងមានកីឡាករលេងនៅក្លឹបធំៗច្រើនជាងម៉ារុក។ តែទោះជាយ៉ាងនេះក្ដី ខ្សែការពារ Varane អះអាងថាមិនមើលស្រាលម៉ារុកនោះទេ ពោលគឺលេងតាមក្បួនដែលបានរៀបចំទុក។
កីឡាករកំពុងលេងឱ្យក្លឹបបិសាចក្រហម Manchester United ខាងលើបាននិយាយថា៖ “យើងមានបទពិសោធគ្រប់គ្រាន់ដើម្បីគេចពីអន្ទាក់មួយនេះ។ ពួកគេមកដល់វគ្គនេះសុទ្ធតែមានហេតុផល។ ពួកគេលេងការពារបានល្អ ហើយវាពិតជាពិបាកសម្រាប់យើងមិនខាន។ យើងត្រូវរៀបចំក្រុមសម្រាប់ការប្រកួតមួយនេះឱ្យល្អបំផុត ព្រោះវាជាវគ្គពាក់កណ្ដាលផ្ដាច់ព្រ័ត្រហើយ។ ប្រសិនបើអ្នកចង់ឡើងទៅវគ្គផ្ដាច់ព្រ័ត្រ អ្នកត្រូវផ្ដល់គ្រប់យ៉ាងដល់ការប្រកួតមួយនេះនិងប្រឹងប្រែងដល់ទីបញ្ចប់”៕