លោក Walid Regragui គ្រូបង្វឹករបស់ក្រុមជម្រើសជាតិម៉ារុក បាននិយាយថាលោកមិនផ្ដោតទៅលើការបិទកីឡាករតែម្នាក់នោះទេ ព្រោះកីឡាករបារាំងសុទ្ធតែល្អៗ និងគ្រោះថ្នាក់ច្រើន។
ក្រុមបាល់ទាត់ជម្រើសជាតិម៉ារុកនឹងត្រូវប្រកួត ជាមួយក្រុមបាល់ទាត់ជម្រើសជាតិបារាំងនៅម៉ោង២រំលងអាធ្រាត្រនេះហើយ ក្នុងការប្រកួតវគ្គពាក់កណ្ដាលផ្ដាច់ព្រ័ត្រពានរង្វាន់ FIFA World Cup 2022 ។ មុនការប្រកួតនេះចាប់ផ្ដើម គ្រូបង្វឹករបស់ម៉ារុក លោក Walid Regragui បានអះអាងថាក្រុមរបស់ខ្លួនមិនផ្ដោតតែលើកីឡាករណាម្នាក់នោះទេ ប៉ុន្ដែត្រូវលេងជាក្រុមទើបអាចមានសង្ឃឹមក្នុងការឡើងទៅវគ្គបន្ដបាន។ បារាំងជាក្រុមការពារតំណែងជើងឯក និងមានកីឡាករឆ្នើមៗច្រើន ដូច្នេះមិនអាចផ្ដោតតែលើនរណាម្នាក់ឡើយ។
“ខ្ញុំមិនទៅព្យាយាមឬរៀបគម្រោងដើម្បីទប់ Kylian នោះទេ។ បារាំងក៏មានកីឡាករផ្សេងទៀតល្អដែរ។ Griezmann កំពុងលេងដល់កម្រិតកំពូលរបស់ខ្លួន ហើយលេងបានល្អថែមទៀតនៅតំបន់ស្លាប ហើយ Dembele ក៏កំពុងពេញទម្រង់ដែរ ដោយសហការគ្នាល្អណាស់ជាមួយ Mbappe នៅស្លាបម្ខាងទៀត។ ប្រសិនបើយើងផ្ដោតតែ Mbappe នោះនឹងក្លាយជាកំហុសមួយហើយ”។ សម្ដីរបស់លោក Regragui ក្នុងសន្នីសីទកាសែត៕