ខ្សែបម្រើ Luka Modric បានអបអរក្រុមអាហ្សង់ទីនដែលឡើងដល់វគ្គផ្ដាច់ព្រ័ត្រ FIFA World Cup 2022 នេះ ហើយក៏សង្ឃឹមថា Lionel Messi បានឈ្នះពាននៅឆ្នាំនេះផងដែរ។
ក្រុមក្រូអាតរបស់ Modric បានបរាជ័យក្រោមថ្វីជើងក្រុមអាហ្សង់ទីនក្នុងលទ្ធផលដល់ទៅ ៣-០ ឯណោះក្នុងការប្រកួតវគ្គពាក់កណ្ដាលផ្ដាច់ព្រ័ត្រនៅយប់មិញនេះ។ តែទោះជាចាញ់យ៉ាងណាក្ដី ក៏ប្រធានក្រុម Modric ទទួលស្គាល់ ហើយក៏អបអរដល់គូប្រជែងអាហ្សង់ទីនផងដែរ ព្រោះពួកគេសក្ដិសមនឹងទទួលបានជ័យជម្នះលើការប្រកួតដែលក្រុមឡាទីនមួយនេះធ្វើបានល្អបំផុតដែរ។
កីឡាករលេងនៅក្លឹបអាជីព Real Madrid និងលេង World Cup ចុងក្រោយនៅឆ្នាំនេះ ខាងលើបាននិយាយក្រោយចប់ការប្រកួតថា៖ “អបអរនិងសំណាងល្អដល់អាហ្សង់ទីននៅប្រកួតផ្ដាច់ព្រ័ត្រ។ ខ្ញុំសង្ឃឹមថា Messi នឹងឈ្នះពាន World Cup ជាមួយក្រុមអាហ្សង់ទីន ព្រោះគាត់សមនឹងទទួលបានវា។ Messi ជាកីឡាករល្អបំផុតក្នុងប្រវត្តិសាស្ត្របាល់ទាត់ ហើយគាត់បានបង្ហាញវាក្នុងការប្រកួតព្រឹត្តិការណ៍នេះ”៕