ខ្សែប្រយុទ្ធ Lionel Messi បានអះអាងថាខ្លួនកំពុងមានអារម្មណ៍ល្អ និងបានត្រៀមរួចរាល់អស់ហើយសម្រាប់ការប្រកួតវគ្គផ្ដាច់ព្រ័ត្រពានរង្វាន់ FIFA World Cup 2022 ខាងមុខនេះ។
Messi បានជួយក្រុមអាហ្សង់ទីនយកឈ្នះលើក្រុមក្រូអាតក្នុងលទ្ធផល ៣-០ សម្រាប់ការប្រកួតវគ្កពាក់កណ្ដាលផ្ដាច់ព្រ័ត្រពានរង្វាន់ FIFA World Cup 2022 កន្លងទៅនេះ។ នេះជាលើកទី២ហើយសម្រាប់កីឡាករវ័យ៣៥ឆ្នាំក្នុងការឡើងដល់វគ្គផ្ដាច់ព្រ័ត្រ ខណៈដែលនៅឆ្នាំ២០១៤កន្លងទៅ ពួកគេលេងចាញ់ក្រុមអាល្លឺម៉ង់ក្នុងលទ្ធផល ១-០ របូតឱកាសលើកពាន World Cup ជាលើកដំបូងវិញ ក្រោយពីខកខានតាំងពីឆ្នាំ១៩៨៦មក។
Messi បាននិយាយដូច្នេះថា៖ “ខ្ញុំមិនច្បាស់ទេថាវាជា World Cup ចុងក្រោយឬអត់។ ខ្ញុំកំពុងសប្បាយចិត្តសម្រាប់ការប្រកួត World Cup ឆ្នាំនេះ។ យើងមានទំនុកចិត្តមែនទែនជាមួយសមាជិកក្រុមទាំងអស់។ យើងដឹងថាយើងជានរណា អ្វីត្រូវធ្វើ និងមានភាពជឿជាក់លើខ្លួនឯង។ ខ្ញុំបានត្រៀមជាស្រេចក្នុងការផ្ដល់គ្រប់យ៉ាងនៅប្រកួតចុងក្រោយនៃ World Cup 2022 នេះ”៕