ម៉ារុក បានក្លាយជាក្រុមដំបូងគេនៅក្នុងប្រវត្តិសាស្ត្រទ្វីបអាហ្រ្វិកដែលអាចឡើងដល់វគ្គពាក់កណ្ដាលផ្ដាច់ព្រ័ត្រពានរង្វាន់ FIFA World Cup 2022 បាន។
ពួកគេបានឡើងដល់វគ្គនេះ ក្រោយពីយកឈ្នះលើក្រុមព័រទុយហ្គាល់ ១-០ យកឈ្នះអេស្ប៉ាញនៅវគ្គប៉េណាល់ទី និងធ្វើបានល្អមែនទែននៅវគ្គសន្សំពិន្ទុក្នុងពូលផង។ ម៉ារុក ក៏នឹងបន្ដដំណើររបស់ពួកគេ ដោយប៉ះក្រុមការពារតំណែងជើងឯកបារាំងថែមទៀតនៅវគ្គពាក់កណ្ដាលផ្ដាច់ព្រ័ត្រនេះ ដែលវានឹងក្លាយជាការប្រកួតជក់ចិត្តនិងអ្នកគាំទ្រតាមដានជាងគេផងដែរ។
លោកRegragui គ្រូបង្វឹករបស់ក្រុមម៉ារុក បាននិយាយមុនការប្រកួតថា៖ “យើងជា Rocky Balbao (ឈ្មោះអ្នកប្រដាល់)នៅ World Cup នេះ។ វាមិនមែនអព្ភូតហេតុអ្វីទេ ប៉ុន្តែវាកើតចេញពីការខិតខំប្រឹងប្រែង។ បន្ទាប់ពីអេស្ប៉ាញ យើងបានយកឈ្នះក្រុមល្អដូចព័រទុយហ្គាល់។ យើង ជាក្រុមដែលគ្រប់គ្នាពេញចិត្តនៅ World Cup នេះ ព្រោះយើងបានបង្ហាញឱ្យពិភពលោកឃើញថា អ្នកអាចជោគជ័យបាន ទោះជាអ្នកមិនមានកីឡាករមានទេពកោសល្យច្រើន និងលុយច្រើនក៏ដោយ”៕