ខ្សែការពារ Josip Juranovic របស់ក្រុមជម្រើសជាតិក្រូអាត ពិតជាមានទំនុកចិត្តលើមិត្តរួមក្រុមរបស់គេមែនទែនជាពិសេសនៅតំបន់បម្រើដែលមាន Luka Modric, Mateo Kovacic និង Marcelo Brozovic។
ក្រុមជម្រើសជាតិក្រូអាត នឹងត្រូវប្រកួតជាមួយក្រុមជម្រើសជាតិអាហ្សង់ទីន ក្នុងការប្រកួតវគ្គពាក់កណ្ដាលផ្ដាច់ព្រ័ត្រពានរង្វាន់ FIFA World Cup 2022 នៅយប់ស្អែកនេះ។ ជំនួបនេះដែរ អាចថាជាការសងសឹកក៏ថាបាន ព្រោះអាហ្សង់ទីនក្រុមរបស់ Lionel Messi នេះ ធ្លាប់ចាញ់ក្រុមក្រូអាតម្ដងមកហើយនៅ World Cup 2018 កន្លងទៅក្នុងលទ្ធផល ៣-០។ ដូច្នេះនៅ World Cup 2022 នេះ ពួកគេប៉ះគ្នាទៀត ដែលអាចជាជំនួបដោះស្រាយគំនុំចាស់ហើយ។
យ៉ាងណាមិញ ក្រូអាតដែលទើបធ្លាក់ប្រេស៊ីលនៅវគ្គ៨ក្រុមចុងក្រោយ ក៏មានសង្ឃឹមដូចគ្នា។ ពួកគេអាចយកឈ្នះលើក្រុមប្រេស៊ីលបាន ដូច្នេះកម្លាំងចិត្តមានកាន់តែខ្លាំងមុនការប៉ះអាហ្សង់ទីននេះ។ ខ្សែការពារ Josip Juranovic របស់ក្រុមជម្រើសជាតិក្រូអាតបាននិយាយនិងជឿជាក់លើមិត្តរួមក្រុមរបស់គេមែនទែន ដោយអះអាងថា៖ “Mateo, Luka និងMarcelo គឺជាខ្សែបម្រើក្រូអាតល្អបំផុតក្នុងប្រវត្តិសាស្ត្រ។ ខ្ញុំមិនគិតថានឹងមានអ្នកធ្វើបានល្អដូចពួកគេនោះទេ។ នៅពេលអ្នកបោះបាល់ឱ្យពួកកេ វាមានសុវត្ថិភាពជាងមានលុយដាក់នៅអនាគារទៅទៀត។ ខ្ញុំមិនគិតថាយើងត្រូវខ្លាចនរណាឡើយ។ យើងត្រូវមើលលើខ្លួនឯង និងលេងឱ្យបានល្អបំផុត”៕