ខ្សែប្រយុទ្ធ Cristiano Ronaldo និងមិត្តរួមក្រុម៩នាក់ទៀត មិនទាន់ចាកចេញពីប្រទេសកាតា ត្រលប់ទៅព័រទុយហ្គាល់វិញនោះទេ ក្រោយពីបញ្ចប់ការប្រកួត World Cup 2022 នៅត្រឹមវគ្គ៨ក្រុមចុងក្រោយ។
ព័រទុយហ្គាល់បានបរាជ័យក្រោមថ្វីជើងក្រុមម៉ារុកក្នុងលទ្ធផល ២-១ នៅវគ្គ៨ក្រុមចុងក្រោយ ខកខានឱកាសឡើងទៅវគ្គពាក់កណ្ដាលផ្ដាច់ព្រ័ត្រទៅហើយ។ ការខកចិត្តមួយនេះ ពិតជាធ្វើឱ្យ Ronaldo ខកបំណងមែនទែន រហូតដល់យំដើរចេញពីទីលានគួរឱ្យអាណិតបំផុត។ មួយវិញទៀត នៅពេលនេះគេក៏មិនទាន់ប្រាកដថាអាជីពនៅជម្រើសជាតិរបស់ Ronaldo នឹងបញ្ចប់ត្រឹមនេះ ឬក៏អាចបន្ដលេងទៀតផងដែរ ព្រោះ World Cup នៅឆ្នាំនេះ គេមិនត្រូវបានដាក់ឱ្យជាប់ជម្រើស១១នាក់ដំបូងនោះទេនៅ២ប្រកួតចុងក្រោយ។
ក្រៅពីខកបំណងទៅ Ronaldo និងមិត្តរួមក្រុម៩នាក់ទៀតមាន Bernardo Silva, Bruno Fernandes, Diogo Dalot, Ruben Neves, Rui Patricio, Raphael Guerreiro, Rafael Leao, Joao Cancelo និង Maheus Nunes មិនបានធ្វើដំណើរទៅប្រទេសព័រទុយហ្គាល់ជាមួយកីឡាករដទៃទៀតនោះទេ។ ពួកគេបន្ដនៅលំហែរកាយក្នុងប្រទេសកាតាទៀតសិន៕