Harry Maguire ខ្សែការពារក្រុមជម្រើសជាតិអង់គ្លេស បានចាត់ទុកលោក Wilton Pereira អាជ្ញាកណ្ដាលកាត់សេចក្ដីជំនួបអង់គ្លេសជាមួយបារាំង ថាជាអាជ្ញាកណ្ដាលស្ទើរបទពិសោធ និងមិនអាចកាត់ក្ដីប្រកួតធំបាននោះទេ។
អង់គ្លេស បានធ្លាក់ចេញពីពានរង្វាន់ FIFA World Cup 2022 ហើយ ក្រោយពីលេងចាញ់ក្រុមបារាំងក្នុងលទ្ធផល ២-១។ ខណៈដែលក្រោយពីចប់ការប្រកួតនេះទៅ អង់គ្លេសបានដាក់បន្ទុកខ្លាំងមែនទែនសម្រាប់ក្រុមមន្ត្រីអាជ្ញាកណ្ដាល ក្រោយពីពួកគេមិនបានផ្ដល់បាល់ប៉េណាល់ទីឱ្យអង់គ្លេសនិងកំហុសច្រើនកន្លែងដែល ពួកគេមិនបានចាប់។
ជាមួយគ្នានេះដែរ Harry Maguire បាននិយាយទៅកាន់អាជ្ញាកណ្ដាលក្រោយចប់ការប្រកួតថា៖ “ខ្ញុំមិនអាចទៅពន្យល់ថាពួកគេធ្វើការយ៉ាប់ប៉ុណ្ណានោះទេ។ ពួកគេពិតជាអន់ខ្លាំងណាស់។ កំហុសមានតាំងពីបើកឆាក ជាច្រើនលើក ប៉ុន្តែពួកគេមិនបានផ្ដល់កាតព្រមាននោះទេ។ ការសម្រេចពេញ១ប្រកួតនេះ មិនថាតូចមិនថាធំ គាត់មិនបានផ្ដល់អ្វីឱ្យយើងឡើយ ពេញ១ប្រកួតនេះគាត់ពិតជាធ្វើមិនបានល្អបន្ដិចនោះទេ”៕