អ្នកចាំទីនិងប្រធានក្រុមអាល្លឺម៉ង់ Manuel Neuer នឹងត្រូវសម្រាករហូតដល់ចប់រដូវកាលនេះ បន្ទាប់ពីរូបគេរងគ្រោះថ្នាក់អំឡុងពេលទៅសម្រាកជិះស្គីកម្សាន្ដរហូតដល់បាក់ជើងទៅហើយ។
កីឡាករវ័យ៣៦ឆ្នាំ ដែលមិនអាចជួយក្រុមអាល្លឺម៉ង់ឱ្យឆ្លងផុតវគ្គចែកពូលក្នុងការប្រកួត FIFA World Cup 2022 នេះ បានរងរបួសធ្ងន់ធ្ងរមែនទែន។ គេទៅសម្រាកលំហែកាយក្រោយចប់ភារកិច្ច World Cup ហើយក៏រងគ្រោះថ្នាក់អំឡុងពេលជិះស្គីតែម្ដង។ Neuer បានវះកាត់កាលពីថ្ងៃសុក្រកន្លងទៅម្ល៉េះ ហើយក៏បានជោគជ័យនៅត្រង់ជើងបាក់របស់គេផងដែរ។ យ៉ាងណា អ្នកចាំទីរូបនេះនឹងសម្រាករហូតដល់ចប់រដូវកាលនេះតែម្ដង មិនអាចជួយក្រុម Bayern Munich ទៀតទេ។
វាជាដំណឹងមិនល្អមួយសម្រាប់អាល្លឺម៉ង់ ព្រោះថាក្រុមមួយនេះបានបាត់បង់កីឡាករសំខាន់ម្នាក់ទៅហើយគឺខ្សែការពារ Lucas Hernandez ដែលរងរបួសជង្គង់ត្រូវវះកាត់ដែរពេលលេងឱ្យបារាំងនៅ World Cup ។ ខណៈដែលពេលនេះអត់មានអ្នកចាំទីដៃទី១ Neuer ថែមទៀតរហូតដល់ចប់រដូវកាល។ Bayern Munich នឹងមានភារកិច្ចសំខាន់ថែមទៀតដោយប៉ះ PSG នៅវគ្គ១៦ក្រុមចុងក្រោយ Champions League នាថ្ងៃទី១៤ខែវិច្ឆិកាឆ្នាំ២០២៣៕