លោក Walid Regragui គ្រូបង្វឹកក្រុមជម្រើសជាតិម៉ារុក បានអះអាងថាការមកដល់វគ្គនេះគឺក្រុមម៉ារុកអាចមានក្ដីស្រមៃក្នុងការឈ្នះពានរង្វាន់ FIFA World Cup 2022 បានហើយ។
ម៉ារុកបានក្លាយជាប្រទេសដំបូងនៅអាហ្វ្រិកដែលអាចឡើងដល់វគ្គពាក់កណ្ដាលផ្ដាច់ព្រ័ត្រពានរង្វាន់ FIFA World Cup 2022 នេះបាន។ ខណៈដែលដំណើរមកដល់វគ្គនេះរបស់ពួកគេពិតជាអស្ចារ្យមែនទែនដោយទម្លាក់បែលហ្សិក អេស្ប៉ាញ និងចុងក្រោយនេះយកឈ្នះលើក្រុមព័រទុយហ្គាល់បានថែមទៀត។ នៅវគ្គពាក់កណ្ដាលផ្ដាច់ព្រ័ត្រ ក្រុមខ្លាំងខាងការពារមួយនេះនឹងត្រូវតតាំងជាមួយក្រុមបារាំងថែមទៀតដែលជាក្រុមការពារតំណែងជើងឯកផង។
លោក Walid Regragui បាននិយាយចំពោះការធ្វើបានល្អរបស់ក្រុមនេះថា៖ “អ្វីដែលសំខាន់សម្រាប់អនាគតគឺយើងបានបង្ហាញថាក្រុមនៅអាហ្វ្រិកអាចឡើងដល់វគ្គពាក់កណ្ដាលផ្ដាច់ព្រ័ត្របាន ឬអាចដល់ផ្ដាច់ព្រ័ត្រផងមិនដឹង។ ក្រុមប្រទេសនៅអឺរ៉ុបធ្លាប់ឈ្នះ World Cup រូចហើយ ដូច្នេះយើងក៏ត្រូវតែព្យាយាមឱ្យដល់ចំណុចនោះដែរ។ ហេតុអ្វីយើងមិនស្រមៃក្នុងការឈ្នះពានបាន? ”៕