ក្រុមបាល់ទាត់ជម្រើសជាតិព័រទុយហ្គាល់ និងក្រុមអង់គ្លេស បានធ្លាក់ចេញពីពានរង្វាន់ FIFA World Cup 2022 ហើយ បន្ទាប់ពីបរាជ័យដូចគ្នានៅវគ្គ៨ក្រុមចុងក្រោយ។
ព័រទុយហ្គាល់ លេងចាញ់ក្រុមម៉ារុកក្នុងលទ្ធផល ១-០។ ដោយក្នុងការប្រកួតនេះ ព័រទុយហ្គាល់ព្យាយាមណាស់ដែរ ប៉ុន្តែមិនអាចមានគ្រាប់បាល់កើតឡើងនោះទេ។ ស្របពេលកីឡាករក្រុមព័រទុយហ្គាល់ បានដាក់បន្ទុកទៅលើក្រុមមន្ត្រីអាជ្ញាកណ្ដាលក្នុងការប្រកួតនេះ។ ពួកគេគិតថា មានបញ្ហាមួយចំនួនកើតឡើងទៅលើការកាត់សេចក្ដី ទើបបានជាក្រុមខ្លួនបរាជ័យបែបនេះ។
ស្របពេលអង់គ្លេសវិញ បានលេងចាញ់ក្រុមការពារតំណែងជើងឯកបារាំងក្នុងលទ្ធផល ២-១។ បារាំងបានឡើងទៅវគ្គបន្ដ ខណៈដែលអង់គ្លេសវិញពិតជាសោកស្ដាយ ព្រោះពួកគេមានឱកាសតាមស្មើនៅចុងម៉ោងទៅហើយ ប៉ុន្តែ Harry Kane ទាត់ប៉េណាល់ទីមិនចូលទៅវិញ។ មានអ្នកវិភាគជាច្រើនមើលឃើញថាអង់គ្លេសលេងបានល្អ និងសម្រុកទៅលើបារាំងខ្លាំង ហើយក៏សមទទួលបានបាល់ប៉េណាល់ទីច្រើនទៀតដែរ ប៉ុន្តែបែរជាអាជ្ញាកណ្ដាលមិនឱ្យទៅវិញ។
រំលឹកថាក្រុមឡើងទៅវគ្គពាក់កណ្ដាលផ្ដាច់ព្រ័ត្រពានរង្វាន់ FIFA World Cup 2022 បានរកឃើញហើយគឺ អាហ្សង់ទីន ក្រូអាត ម៉ារុក និងបារាំង៕