លោក Didier Deschamps គ្រូបង្វឹកក្រុមជម្រើសជាតិបារាំង បានអះអាងថាក្រុមអង់គ្លេសនៅ FIFA World Cup 2022 នេះ មិនមានចំណុចខ្សោយទាល់តែសោះ ពោលគឺពួកគេបានរៀបចំក្រុមបានល្អណាស់។
ក្រុមបាល់ទាត់ជម្រើសជាតិអង់គ្លេស និងក្រុមជម្រើសជាតិបារាំង នឹងត្រូវប៉ះគ្នានៅវគ្គ៨ក្រុមចុងក្រោយនៃពានរង្វាន់ FIFA World Cup 2022 វេលាម៉ោង២រំលងអាធ្រាត្រនេះហើយ។ ជំនួបធំខាងលើនេះដែរ ត្រូវបានអ្នកគាំទ្រទន្ទឹងរង់ចាំទស្សនាជាងគេ ព្រោះក្រុមទាំងពីរនេះសុទ្ធតែធ្វើបានល្អ និងពោរពេញដោយកីឡាករឆ្នើមៗទាំងអស់។ ស្របពេលបារាំងក៏ជាក្រុមការពារតំណែងជើងឯក FIFA World Cup 2022 នេះផង។
មុនការប្រកួតលោក Didier Deschamps គ្រូបង្វឹកក្រុមជម្រើសជាតិបារាំងបាននិយាយពីក្រុមជម្រើសជាតិអង់គ្លេសថា៖ “ខ្ញុំបានមើលការប្រកួតពួកគេ។ ពួកគេមិនមានចំណុចខ្សោយទេ។ ខ្ញុំជឿថាពួកគេក៏បានត្រៀខ្លួន និងមើលការប្រកួតរបស់យើងដូចគ្នាដើម្បីស្វែងរកចំណុចខ្សោយរបស់យើង។ ខ្ញុំជឿថាអង់គ្លេសនឹងរៀបចំដើម្បីជួប Kylian ដូចដែលក្រុមដទៃកន្លងមកដែរ។ ប៉ុន្តែ Kylian តែងតែអាចរកឱកាសជានិច្ច ហើយយើងក៏មានកីឡាករដទៃទៀតដែលអាចបង្កគ្រោះថ្នាក់ដល់ពួកគេផងដែរ”៕