លោក Fernando Santos គ្រូបង្វឹកក្រុមជម្រើសជាតិព័រទុយហ្គាល់ បាននិយាយថាខ្សែប្រយុទ្ធ Cristiano Ronaldo មិនសមនឹងទទួលបានការរិះគន់ និងចុះផ្សាយរឿងមិនពិតច្រើនបែបនេះទេ។
Ronaldo ក្រោយពីអង្គុយកៅអីបម្រុងទល់ក្រុមស្វីសមក ត្រូវបានគេចុះផ្សាយច្រើនមែនទែន ហើយមានខ្លះថែមទាំងចុះថារូបគេព្រមានដើរចេញពីក្រុមជម្រើសជាតិព័រទុយហ្គាល់ថែមទៀត ក្រោយពីមិនបានជាប់ជម្រើស១១នាក់ដំបូង។ ក្រោយពីមានការផ្សាយរឿងមិនពិតនេះហើយ ខាងសហព័ន្ធបាល់ទាត់ព័រទុយហ្គាល់ ក៏ដូចជាសាមីខ្លួនផ្ទាល់សុទ្ធតែចេញមុខមកអះអាងនិងបកស្រាយថាវាជាមិនមែនជារឿងនោះទេ។ Ronaldo នៅតែជាប្រធានក្រុម និងបន្ដចង់ជួយព័រទុយហ្គាល់ឱ្យជោគជ័យជានិច្ច។
ចំពោះបញ្ហាខាងលើនេះដែរ លោក Santos គ្រូបង្វឹកព័រទុយហ្គាល់បាននិយាយថា៖ “ខ្ញុំគិតថាល្មមឱ្យគាត់នៅម្នាក់ឯងបានហើយ។ គ្រប់គ្នាតែងតែលើកពីគាត់មកនិយាយទាំងដែលពេលខ្លះគាត់មិនដែលបានធ្វើអ្វីផង។ គាត់មិនដែលប្រាប់ខ្ញុំថាចង់ចាកចេញពីជម្រើសជាតិទេ។ ខ្ញុំគិតថាល្មមបញ្ឈប់រឿងមិនពិតនេះហើយ។ យើងគួរតែឈប់ និយាយអ្វីដែលមិនពិតទៀតទៅ។ Ronaldo មិនសមទទួលបានរឿងទាំងអស់នេះទេ គាត់បានធ្វើច្រើនណាស់សម្រាប់បាល់ទាត់”៕