លោក Tite បានប្រកាសលាឈប់ពីតំណែងគ្រូបង្វឹកក្រុមជម្រើសជាតិប្រេស៊ីលភ្លាម បន្ទាប់ពីក្រុមរបស់លោកលេងចាញ់ក្រុមក្រូអាតនៅវគ្គ៨ក្រុមចុងក្រោយ FIFA World Cup 2022 ។
ក្រុមប្រេស៊ីលមិនអាចធ្វើអ្វីក្រុមក្រូអាតបាននោះទេ ពោលគឺចប់១២០នាទី ពួកគេស្មើគ្នា១-១។ នៅវគ្គប៉េណាល់ទីនេះដែរ ក្រុមក្រូអាតនៅតែធ្វើបានល្អដូចកាលពួកគេទាត់ជាមួយក្រុមជប៉ុនដូចគ្នាដែរ។ ខណៈដែលក្រុមប្រេស៊ីលវិញ ទាត់មិនចូលដល់ទៅ២គ្រាប់ និងរបូតឱកាសឈ្នះឡើងទៅវគ្គពាក់កណ្ដាលផ្ដាច់ព្រ័ត្រទៅហើយ។ នេះជាការខកចិត្តខ្លាំងមែនទែនសម្រាប់ក្រុមប្រេស៊ីល គ្រាដែលមុនការប្រកួត ពួកគេរំពឹងថានឹងធ្វើបានល្អច្រើនជាងនេះ។
ក្រោយពីបរាជ័យនេះហើយ លោក Tite ដែលជាគ្រូបង្វឹករបស់ក្រុមប្រេស៊ីលក៏បានប្រកាសពីការចាកចេញពីតំណែងរបស់លោកផងដែរ។ បុរសវ័យ៦១ឆ្នាំនេះ ចូលដឹកនាំក្រុមប្រេស៊ីលតាំងពីឆ្នាំ២០១៦មក ដោយជំនួសលោក Dunga ។ លោក Tite ដឹកនាំក្រុមបាន៨១ប្រកួត និងឈ្នះបាន៦០ប្រកួតឯណោះ៕