សហព័ន្ធបាល់ទាត់ព័រទុយហ្គាល់ បានអះអាងដំណឹងដែលចុះផ្សាយ Cristiano Ronaldo មានបញ្ហាជាមួយគ្រូបង្វឹក និងមិត្តរួមក្រុមរហូតដល់ចង់ចេញពី World Cup នោះ គឺជារឿងមិនពិតនោះទេ។
Ronaldo ត្រូវបានអង្គុយកៅអីបម្រុងក្នុងការប្រកួតទល់ក្រុមស្វីសកន្លងទៅ ដែលធ្វើឱ្យសាមីខ្លួនហាក់ដូចជាមិនសូវពេញចិត្តនោះទេ។ ក្រោយពីចប់ការប្រកួតទៅ មានដំណឹងច្រើនចុះផ្សាយថា Ronaldo ចង់ចាកចេញពីក្រុមជម្រើសជាតិនៅត្រឹមនេះតែម្ដង ព្រោះមិនពេញចិត្តដែលឱ្យគេអង្គុយកៅអីបម្រុង។ តែគ្រប់យ៉ាងនៅពេលនេះ ត្រូវបានលាតត្រដាងហើយ។ សហព័ន្ធបាល់ទាត់ព័រទុយហ្គាល់ អះអាងថាការចុះផ្សាយទាំងអស់នោះមិនមែនជារឿងពិតនោះទេ។ Ronaldo នៅតែបន្ដជាមួយក្រុម ហើយប្រកួតប្រជែងរហូតដល់ទីបញ្ចប់។
ស្របពេលជាមួយគ្នានោះ Ronaldo ក៏បានបង្ហោះសារនៅលើបណ្ដាញសង្គមដែរ។ ដោយក្នុងសារនោះមានន័យថាព័រទុយហ្គាល់ជាក្រុមមួយដែលសហការគ្នា។ ជាក្រុមមួយដែលមិនងាយបែកបាក់ដោយសារអ្នកក្រៅនោះទេ។ ព័រទុយហ្គាល់ នឹងតស៊ូ ដើម្បីក្ដីសុបិនរហូតដល់ទីបញ្ចប់៕