ខ្សែបម្រើ Luka Modric បាននិយាយថាក្រុមជម្រើសជាតិក្រូអាតរបស់ខ្លួនលេងមិនដែលឈ្នះប្រេស៊ីលនោះទេ ដូច្នេះនៅរាត្រីនេះគេសង្ឃឹមថានឹងអាចផ្លាស់ប្ដូរទម្លាប់នេះបាន។
ក្រូអាត នឹងត្រូវប៉ះជាមួយក្រុមជម្រើសជាតិប្រេស៊ីលនៅម៉ោង១០យប់នេះ សម្រាប់ការប្រកួតវគ្គ៨ក្រុមចុងក្រោយនៃព្រឹត្តិការណ៍ FIFA World Cup 2022 នៅប្រទេសកាតា។ មុនការប្រកួតនោះឈានចូលមកដល់ ក្រុមក្រូអាតដែលមានលោក Zlatko Dalic ជាគ្រូបង្វឹកនោះសង្ឃឹមថាអាចកសាងប្រវត្តិសាស្ត្រល្អបានទៀត។ លោក ចាត់ទុកថាក្រូអាតធ្វើបានល្អណាស់ហើយតាំងពី World Cup 2018 មក ព្រោះក្រូអាតជាប្រទេសតូច ប៉ុន្តែអាចឡើងដល់វគ្គផ្ដាច់ព្រ័ត្រនៅឆ្នាំ២០១៨ និងបានដល់វគ្គ៨ក្រុមចុងក្រោយឆ្នាំ២០២២នេះទៀត នោះវាមិនមែនជារឿងធម្មតានោះទេ។
ដោយឡែកសម្រាប់ Luka Modric វិញ បាននិយាយដែរថា៖ “យើងធ្លាប់ជួបប្រេស៊ីលច្រើនដងដែរ ហើយមិនដែលឈ្នះពួកគេនោះទេ។ ខ្ញុំសង្ឃឹមថាយើងអាចផ្លាស់ប្ដូរទម្លាប់នេះបាននៅរាត្រីនេះ។ នេះជាការប្រកួតអស្ចារ្យបំផុតក្នុងពានរង្វាន់ World Cup ដែលនៅចំពោះមុខយើង។ ពួកគេជាក្រុមខ្លាំងបំផុតនិងជាក្រុមគេគិតថាអាចឈ្នះ World Cup បានទៀត”។ ខណៈដែលក្រុមក្រូអាតនេះ ប៉ះប្រេស៊ីល៤ដង គឺចាញ់៣ដង និងស្មើគ្នាម្ដង៕