លោក Luis Enrique បានប្រកាសលាឈប់ពីក្រុមជម្រើសជាតិអេស្ប៉ាញហើយ ក្រោយពីលោកដឹកនាំក្រុមមិនបានល្អនៅ FIFA World Cup 2022 ធ្លាក់ត្រឹមវគ្គ១៦ក្រុមចុងក្រោយ។
បុរសវ័យ៥២ឆ្នាំនេះ ចូលដឹកនាំក្រុមអេស្ប៉ាញនៅឆ្នាំ២០១៨ និងបានជួយប្រទេសនេះឡើងដល់វគ្គពាក់កណ្ដាលផ្ដាច់ព្រ័ត្រពានរង្វាន់ Euro 2020 ផងដែរ។ តែនៅ World Cup 2022 នេះ ពួកគេធ្វើមិនបានល្អឡើយ ដោយលេងចាញ់ក្រុមម៉ារុកនៅវគ្គប៉េណាល់ទី។ ដោយសារតែការធ្វើមិនបានល្អដូចអ្វីដែលគ្រោងទុកនេះហើយ ទើបបានជាលោក Enrique សម្រេចចិត្តចាកចេញតែម្ដង។
De la Fuente គ្រូបង្វឹករបស់ក្រុមជម្រើសជាតិ U21 ទំនងជានឹងឡើងមកកាន់តំណែងក្រុមធំនេះបន្ដ ប៉ុន្តែការសម្រេចក៏ត្រូវឆ្លងកាត់ថ្នាក់ដឹកនាំសហព័ន្ធបាល់ទាត់អេស្ប៉ាញសិនដែរ។ លោក De la Fuente ចូលធ្វើការនៅជម្រើសជាតិអេស្ប៉ាញតាំងពីឆ្នាំ២០១៣មក ដោយដឹកនាំក្រុមយុវជន និងជួយអេស្ប៉ាញបានមេដាយប្រាក់នៅព្រឹត្តិការណ៍ Tokyo Olympics 2020 ផងដែរ៕