បាល់ទាត់ បាល់ទះជាកីឡាដ៏ពេញនិយមនៅទូទាំងសកលលោក ដោយមួយផ្តោតលើការប្រើប្រាស់ជើង មួយទៀតប្រើប្រាស់ដៃ ហើយកម្រណាស់ដែលមានអត្តពលិក ចេះជំនាញវិស័យកីឡាទាំងពីរព្រមគ្នា រហូតដល់ធ្លាប់តំណាងឲ្យប្រទេស ប្រកួតលើឆាកអន្តរជាតិ។
CTS Sports សូមធ្វើការរំឭកលើកមកបង្ហាញ នូវរឿងរ៉ាវដ៏គួរឲ្យចាប់អារម្មណ៍ របស់កីឡាករអាជីពនៅ World Cup ២ រូប ដ្បិតពេលនេះឈរជើងលើវិស័យបាល់ទាត់តំណាងឲ្យប្រទេសរបស់ពួកគេ តែកន្លងមកក៏ធ្លាប់ចូលរួមជាមួយវិស័យបាល់ទះដូចគ្នា៖
១) Sardar Azmoun
ខ្សែប្រយុទ្ធរបស់ក្លឹប Bayer Leverkusen និងតំណាងឲ្យជម្រើសជាតិអ៊ីរ៉ង់ កន្លងមកពួកយើងធ្លាប់បានចុះផ្សាយពីគេម្តងហើយ ដែលថាកាលនោះ មានមុខមាត់ដូចជាខ្សែការពារ Harry Maguire របស់ជម្រើសជាតិអង់គ្លេស។
រំឭកទៅអតីតកាល គ្រានៅកុមារភាព Azmoun ដាក់ចិត្តស្រលាញ់វិស័យកីឡាទាំងពីរប្រហែលគ្នា ដោយនៅអាយុប្រហែលជាង ១០ ឆ្នាំ គេកំពុងចាប់ផ្ដើមហ្វឹកហាត់ទាំងបាល់ទាត់ និងបាល់ទះ រហូតដល់ទទួលបានឱកាសទៅចូលរួមជាមួយក្រុមបាល់ទះជម្រើសជាតិអ៊ីរ៉ង់ សម្រាប់យុវជនអាយុក្រោម ១៥ ឆ្នាំ។
ដ្បិតមានឈ្មោះតំណាងឲ្យជម្រើសជាតិ តែយើងក៏មិនទទួលបានព័ត៌មានច្បាស់ការណាមួយ អំពីពានរង្វាន់នានាដែលគេចូលរួម ក៏ដូចជាដំណើរអាជីពបន្តទៅមុខទៀតលើវិស័យមួយនេះ។ គ្រាន់ដឹងថា ឈាមជ័ររបស់ Azmoun គឺឈរលើអាជីពបាល់ទះ ខ្លាំងជាងបាល់ទាត់ ព្រោះឪពុកបង្កើតរបស់គេ លោក Khalil Azmoun អតីតកាលជាកីឡាករបាល់ទះអាជីពដ៏លេចធ្លោមួយរូប ហើយក្រោយមកក៏ក្លាយជាគ្រូបង្វឹកផងដែរ។
២) Ivan Perisic
ខ្សែបម្រើកំពុងឈរឈ្មោះឲ្យក្រុមបាល់ទាត់ជម្រើសជាតិក្រូអាត នៅវគ្គ ៨ ក្រុមចុងក្រោយ World Cup អតីតកាលក៏ធ្លាប់ជាកីឡាករបាល់ទះលើឆ្នេរខ្សាច់ ឲ្យសហព័ន្ធបាល់ទះនៃប្រទេសខាងលើដូចគ្នា។
កំឡុងរដូវក្តៅ ជាពេលវេលាសម្រាកពីអាជីពបាល់ទាត់ជាមួយក្លឹប Inter Milan កាលឆ្នាំ ២០១៧ បុរសកម្ពស់បាន ១,៨៦ ម៉ែត្រ បានចាប់ដៃគូជាមួយកីឡាករ Niksa Dell’Orco តំណាងឲ្យក្រូអាត ប្រកួតនៅពានរង្វាន់បាល់ទះឆ្នេរខ្សាច់ FIVB Beach Volleyball World Tour Porec Major។ យ៉ាងណាលទ្ធផល ពួកគេបរាជ័យទាំង ៣ ប្រកួតទល់ក្រុមមកពីសហរដ្ឋអាមេរិក និងប្រេស៊ីល តែបើតាមការចុះផ្សាយពីសារព័ត៌មាន Bild បានសង្កត់ធ្ងន់ ប្រសិនពេលនោះ Perisic អាចឡើងទៅវគ្គបន្ទាប់ ក៏នឹងត្រូវខកខានពេលវេលាហ្វឹកហាត់បាល់ទាត់ ត្រៀមបើករដូវកាលជាមួយ Inter ម្ល៉េះអាចនឹងរងការពិន័យក៏ថាបាន។
Perisic ធ្លាប់ប្រាប់យ៉ាងដូច្នោះថា៖ “វាជាក្តីស្រមៃរបស់ខ្ញុំ ខ្ញុំចាប់ចេះលេងបាល់ទះលើឆ្នេរខ្សាច់តាំងពីអាយុ ១០ ឆ្នាំ ខ្ញុំស្រលាញ់កីឡាមួយនេះណាស់ ហើយតែងតែហ្វឹកហាត់អនុវត្តវានៅរដូវក្តៅ ខ្ញុំពិតជាអរគុណដែលផ្តល់ឱកាសសារនេះ ឲ្យខ្ញុំបានលេងទល់កីឡាករបាល់ទះល្អៗជាច្រើនក្នុងលោក វាជាអារម្មណ៍ដ៏អស្ចារ្យ បើទោះបីចាញ់ក៏ដោយ”៕
ប្រភព៖ បរទេស