លោក Erik ten Hag បានបង្ហាញការមិនពេញចិត្តជាខ្លាំង ចំពោះទម្រង់លេងរបស់ក្រុមបិសាចក្រហម Manchester United ដែលលេងចាញ់ក្រុម Cadiz នៅបាតតារាង La Liga ក្នុងលទ្ធផល ៤-២។
ជំនួបមិត្តភាពកម្ដៅសាច់ដុំខាងលើនេះ ក្រុម Man Utd ហាក់ដូចជាលេងមិនបានល្អនោះទេ ហើយក៏របូតគ្រាប់បាល់ដល់ទៅ៤គ្រាប់ថែមទៀត។ ការបង្ហាញទម្រង់លេងបែបនេះហើយ ទើបបានជាលោក Erik ten Hag មិនសប្បាយចិត្តឡើយ។ គ្រូបង្វឹករូបនេះបានអះអាងថាកូនក្រុមរបស់ខ្លួនលេងដូចមិនចង់លេង ពួកគេហាក់ដូចជាកំពុងគេងលក់អីចឹង មិនមានស្មារតីក្នុងការប្រកួតទាល់តែសោះ។
លោក Ten Hag បាននិយាយថា៖ “នៅ១៥នាទីដំបូងយើងហាក់ដូចជាមិនទាន់ភ្ញាក់ពីគេងទេ។ ជាពិសេសនៅតំបន់បម្រើ ពួកគេមិនរត់ឡើយ។ នេះគឺជារឿងមិនគួរឱ្យកើតមានឡើងសោះ វាមិនអាចទទួលយកបានឡើយ។ តែវាក៏ជាមេរៀនល្អដែរ អ្នកបានឃើញថាប្រសិនបើបង្កកំហុសតែបន្ដិចក្នុងការប្រកួត នោះអ្នកនឹងអាចបរាជ័យបាន។ នេះជាអ្វីដែលកើតឡើងក្នុងវិស័យបាល់ទាត់”៕