ខ្សែប្រយុទ្ធ Eden Hazard បានប្រកាសចូលនិវត្តន៍ពីក្រុមជម្រើសជាតិបែលហ្សិកទៅហើយ ក្រោយពីពួកគេធ្លាក់ពីការប្រកួតពានរង្វាន់ FIFA World Cup 2022 នៅត្រឹមវគ្គក្នុងពូល។
Hazard វ័យ៣១ឆ្នាំបានសម្រេចចិត្តចូលនិវត្តន៍នេះ ក៏ព្រោះតែគេចង់ទុកឱកាសឱ្យកីឡាករក្មេងរបស់បែលហ្សិកបានបង្ហាញសមត្ថភាពម្ដង។ កីឡាករលេងនៅក្លឹបអាជីព Real Madrid នេះជាប់ជម្រើសជាតិតាំងពីឆ្នាំ២០០៨មកម្ល៉េះ ពោលគឺនៅត្រឹមអាយុ១៧ឆ្នាំមក។ សរុបមកដល់ពេលនេះ គេបង្ហាញខ្លួនបាន១២៦ប្រកួត និងរកបានគ្រាប់បាល់សរុប៣៣គ្រាប់ផងដែរ។
អតីតកីឡាកររបស់ក្លឹប Chelsea បាននិយាយថា៖ “អរគុណសម្រាប់ក្ដីស្រលាញ់និងការគាំទ្រកន្លងមក។ អរគុណគ្រប់យ៉ាងរបស់អ្នកគាំទ្រតាំងពីឆ្នាំ២០០៨។ ខ្ញុំសម្រេចចិត្តចាកចេញពីក្រុមជម្រើសជាតិហើយ។ នេះជាការសម្រេចចិត្តរបស់ខ្ញុំ ហើយខ្ញុំពិតជានឹករលឹកអ្នកគ្រប់គ្នាមិនខាន”៕