ខ្សែការពារ Harry Maguire ជឿជាក់ថាក្រុមអង់គ្លេសជឿជាក់លើខ្លួនឯងថានឹងអាចឈ្នះពានរង្វាន់ FIFA World Cup 2022 នេះបាន។
ក្រុមអង់គ្លេសបានឡើងដល់វគ្គពាក់កណ្ដាលផ្ដាច់ព្រ័ត្រកាលពីឆ្នាំ២០១៨កន្លងទៅនៅប្រទេសរុស្ស៊ីក្នុងពានរង្វាន់ World Cup នេះ។ ខណៈដែល៤ឆ្នាំមក ពោលគឺឆ្នាំ២០២២នេះ ពួកគេបានឡើងដល់វគ្គ៨ក្រុមចុងក្រោយទៀតហើយ ដោយប៉ះជាមួយក្រុមបារាំងដែលជាក្រុមជើងឯកឆ្នាំ២០១៨។ ជំនួបធំបំផុតនៅវគ្គ៨ក្រុមចុងក្រោយនេះ នឹងធ្វើឡើងនៅថ្ងៃសៅរចុងសប្ដាហ៍នេះ។
មុនការប្រកួតកើតឡើង ខ្សែការពារ Magurie បានបង្ហាញអារម្មណ៍ថា៖ “ចំណុចមួយដែលខ្ញុំអាចនិយាយបានថាក្រុមយើងនៅពេលនេះខុសពីឆ្នាំ២០១៨ គឺការជឿជាក់លើខ្លួនឯងថានឹងអាចធ្វើទៅរួច។ ខ្ញុំចូលរួមនៅឆ្នាំ២០១៨ ហើយបានដល់វគ្គ៤ក្រុមចុងក្រោយគឺយើងសប្បាយចិត្ត និងអ្នកគាំទ្រក៏ចូលរួមអបអរខ្លាំងផងដែរ។ ខ្ញុំគិតថាពេលនេះ យើងមានភាពជឿជាក់ថាយើងនឹងឈ្នះការប្រកួតនេះ”៕