ក្រុមបាល់ទាត់ជម្រើសជាតិកម្ពុជាបានចាប់ផ្ដើមប្រមូលផ្ដុំហ្វឹកហាត់ជាផ្លូវការហើយ ដើម្បីត្រៀមខ្លួនចូលប្រកួតពានរង្វាន់ AFF Mitsubishi Electric Cup 2022 ដែលនឹងធ្វើចាប់ពីថ្ងៃទី២០ ខែធ្នូ ឆ្នាំ២០២២ ដល់ថ្ងៃទី១៦ ខែមករា ឆ្នាំ២០២៣។
ការប្រមូលផ្ដុំហ្វឹកហាត់នេះដែរ គេមិនទាន់ឃើញវត្តមានរបស់អ្នកចាត់ការ Honda មកបញ្ជានិងណែនាំនោះទេ ដោយសារតែលោកជាប់ភារកិច្ចនៅ World Cup 2022 សិន។ តែកីឡាករដទៃទៀតដែលមានឈ្មោះក្នុងបញ្ជីរួមទាំងកីឡាករមកពីអាមេរិក នីកូឡាសឌឿង ក៏ត្រូវបានគេប្រទះឃើញចូលហាត់ជាមួយក្រុមផងដែរ។ កីឡាករទាំងអស់នឹងសម្រាកជុំគ្នា ក៏ដូចជាហ្វឹកហាត់យ៉ាងខ្លាំង ព្រោះការប្រកួតកាន់តែកៀកចូលមកដល់ហើយ។
កម្ពុជាចូលលេងពានរង្វាន់ AFF Mitsubishi Electric Cup 2022 នេះស្ថិតនៅពូល A ជាមួយក្រុមខ្លាំងៗដូចជា ថៃ ហ្វីលីពីន ឥណ្ឌូណេស៊ី និងព្រុយណេ។ កម្ពុជាក៏នឹងធ្វើជាម្ចាស់ផ្ទះការប្រកួតចំនួន២ប្រកួតផងដែរ ទល់ក្រុមហ្វីលីពីននៅថ្ងៃបើកឆាក ទី២០ខែធ្នូឆ្នាំ២០២២ និងព្រុយណេនៅថ្ងៃទី២៩ខែធ្នូឆ្នាំ២០២២៕