ការប្រកួតកីឡាប្រដាល់គុនខ្មែរ ជើងឯកអាស៊ីអាគ្នេយ៍ (អាស៊ាន) ពីថ្ងៃទី៩-១១ ខែធ្នូ ឆ្នាំ២០២២ នៅក្នុងពិធីបុណ្យសមុទ្រ នៅខេត្តព្រះសីហនុ មានប្រទេសចូលរួមចំនួន៧រួមទាំងម្ចាស់ផ្ទះកម្ពុជា។ នេះជាការប្រកួតត្រៀមខ្លួនឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣។
«ការរៀបចំប្រកួតកីឡាប្រដាល់គុនខ្មែរ ជើងឯកអាស៊ីអាគ្នេយ៍ នៅក្នុងបុណ្យសមុទ្រនេះ គឺជាបុរេព្រឹត្តិការណ៍ (Pre-Sea Games) សម្រាប់ឆ្ពោះទៅទទួលរៀបចំធ្វើម្ចាស់ផ្ទះ ស៊ីហ្គេម ២០២៣។ យើងក៏បានការរៀបចំការបណ្តុះបណ្តាលមន្ត្រីអាជ្ញាកណ្តាល ចៅក្រម មុនពេលការប្រកួតផ្លូវការ។ មកដល់ថ្ងៃនេះ មានប្រតិភូកីឡាមួយចំនួនបានមកដល់ខេត្តព្រះសីហនុហើយ»។ ឯកឧត្តម វ៉ាត់ ចំរើន បានបន្ថែម។
ក្រៅពីការប្រកួតប្រដាល់គុនខ្មែរ គណៈកម្មការរៀបចំកីឡា នៃពិធីបុណ្យសមុទ្រនេះ ក៏រៀបចំការប្រកួតកីឡាមួយចំនួនទៀត ដូចជា ការបង្ហាញកីឡាទូកក្តោង ការប្រកួតកីឡាបាល់បោះ ៣នាក់ទល់៣នាក់ ការរត់ប្រណាំង ៣គីឡូម៉ែត្រ និង៥គីឡូម៉ែត្រ ការប្រណាំងកង់ ៤០គីឡូម៉ែត្រ ២០គីឡូម៉ែត្រ និងការជិះកង់កម្សាន្ត ១៥គីឡូម៉ែត្រ នៅតាមដងផ្លូវស្របតាមមាត់ឆ្នេរសមុទ្រដ៏ទាក់ទាញ ដើម្បីស្រូបទាញ់ឲ្យអ្នកចូលរួមនានាទទួលបានការសប្បាយរីករាយ ដើម្បីចូលរួមអបអរព្រឹត្តិការណ៍បុណ្យសមុទ្រឆ្នាំនេះឲ្យកាន់តែអធិកអធមបន្ថែមទៀត។