លោក Luis Enrique បានអះអាងថាអនាគតរបស់លោកនៅក្រុមជម្រើសជាតិអេស្ប៉ាញនឹងដឹងនៅសប្ដាហ៍ក្រោយនេះ ក្រោយពីដឹកនាំក្រុមចាញ់ម៉ារុកនៅវគ្គ១៦ក្រុមចុងក្រោយ។
អេស្ប៉ាញគ្រប់គ្រងបាល់បានច្រើន ប៉ុន្តែមិនអាចស្វែងរកឱកាសដើម្បីស៊ុតទៅលើក្រុមម៉ារុកបាននោះទេ ខណៈដែលវគ្គប៉េណាល់ទីពួកគេធ្វើមិនបានល្អថែមទៀត។ កត្ដានេះហើយ ទើបធ្វើឱ្យអេស្ប៉ាញខកបំណងមែនទែន ពោលគឺធ្លាក់ត្រឹមវគ្គ១៦ក្រុមចុងក្រោយទៅហើយ។ ការបរាជ័យនេះ បានចោទជាសំណួរច្រើនទៅលើលោក Enrique ពីអនាគតរបស់លោកថានឹងបន្ដដឹកនាំក្រុមនេះបានទៀត ឬត្រូវចាកចេញ។
សម្រាប់ចម្លើយ គ្រូបង្វឹកខាងលើនិយាយថា៖ “ខ្ញុំជាអ្នកទទួលខុសត្រូវ ខ្ញុំជាអ្នករើសកីឡាករទាត់ប៉េណាល់ទី៣នាក់ដំបូង។ ខ្ញុំគិតថាក្មេងៗត្រូវតែទទួលនិងរៀនពីបរាជ័យ បើទោះជាយើងសក្ដិសមទទួលឬអត់ក៏ដោយ។ ពេលនេះ ខ្ញុំកំពុងរង់ចាំពេលត្រលប់ទៅផ្ទះវិញដើម្បីជួបគ្រួសាររបស់ខ្ញុំនិងឆ្កែរបស់ខ្ញុំហើយខ្ញុំអាចនៅជាមួយពួកគេបាន។ ខ្ញុំគិតថាពីសប្ដាហ៍ក្រោយទៅ ប្រធានសហព័ន្ធនឹងពិចារណារឿងអនាគតខ្ញុំហើយ។ នៅពេលនេះ វាមិនមានន័យអ្វីទេសម្រាប់ខ្ញុំ ព្រោះយើងត្រូវការសម្រាកដើម្បីបំបាត់ទុក្ខនេះសិន”៕