លោក Walid Regragui គ្រូបង្វឹករបស់ក្រុមម៉ារុក បានអះអាងថាលោកមានបំណងឱ្យអេស្ប៉ាញគ្រប់គ្រងបាល់ គ្រប់គ្រងការប្រកួតនេះតែម្ដង ដើម្បីទប់ឱ្យចប់១២០នាទី និងឈានដល់វគ្គប៉េណាល់ទីកាត់សេចក្ដី។
ម៉ារុកលេងស្មើអេស្ប៉ាញ ០-០ ក្នុងរយៈពេល១២០នាទី ហើយក៏យកឈ្នះអេស្ប៉ាញបាននៅវគ្គកាត់សេចក្ដីបាល់១១ម៉ែត្រ ក្នុងលទ្ធផល ៣-០ គួរឱ្យភ្ញាក់ផ្អើល។ យ៉ាងណាមិញមុនឈានដល់ទាត់ប៉េណាល់ទីនេះ រយៈពេលលេង១២០នាទី ក្រុមម៉ារុកគ្រប់គ្រងបាល់ត្រឹមតែ២៣%ប៉ុណ្ណោះ និងប៉ះបាល់បាន៣០៥ដង ខណៈដែលអេស្ប៉ាញវិញគ្រប់គ្រងបាល់ច្រើន និងប៉ះដល់ទៅ ១០៤១ដងឯណោះ តែនៅមិនអាចរកគ្រាប់បាល់បានដដែល។
បច្ចេកទេសនៃការប្រកួត លោក Walid Regragui គ្រូបង្វឹកម៉ារុកបាននិយាយថា៖ “យើងចំណាយពេល៤ថ្ងៃដើម្បីសិក្សាពីពួកគេ។ យើងដឹងថា១២០នាទីពួកគេបានប៉ះពាល់ច្រើនមែនទែន ប៉ុន្តែយើងនៅតែអាចមានឱកាសឈ្នះបាន។ ម៉ារុកមិនសម្រុកឬបង្កើតកំហុសនោះទេ។ តាក់តិចក្រុមទាំងមូលធ្វើបានល្អ ដែលនាំឱ្យការប្រកួតឈានដល់វគ្គប៉េណាល់ទី ដែលវាដូចជាការផ្សងសំណាងអីចឹង។ នៅពេលអ្នកមានចាំទីល្អ នោះឱកាសឈ្នះនឹងមានច្រើនមិនខាន”៕