លោក Fernando Santos គ្រូបង្វឹករបស់ក្រុមព័រទុយហ្គាល់បានអះអាងថាការមិនដាក់ខ្សែប្រយុទ្ធ Cristiano Ronaldo ឱ្យចូលលេងនៅយប់មិញនេះ គឺដោយសារតែជាបច្ចេកទេសរបស់ក្រុមដើម្បីយកឈ្នះស្វីស។
ព័រទុយហ្គាល់បានទុកឱ្យ Ronaldo អង្គុយកៅអីបម្រុង មិនអាចជាប់ជម្រើស១១នាក់ដំបូងបានទេក្នុងការប្រកួតដែលពួកគេលត់ក្រុមស្វីសបាន ៦-១។ ស្របពេលកីឡាករវ័យក្មេង Goncalo Ramos ដែលជាអ្នកលេងតំណែងជំនួស Ronaldo នោះក៏ធ្វើបានល្អថែមទៀត។ ខ្សែប្រយុទ្ធវ័យ២១ឆ្នាំបានរក៣គ្រាប់ម្នាក់ឯងក្នុងការប្រកួតមួយនេះ ហើយក្លាយជាកីឡាករវ័យក្មេងជាងគេដែលធ្វើបានហែកទ្រីកក្នុងការប្រកួត World Cup ផងដែរ។
ចំពោះហេតុផលដែលលោក Santos មិនដាក់ Ronaldo ឱ្យលេងជម្រើសដំបូង ត្រូវបានអ្នកចាត់ការរូបនេះអះអាងថាដោយសារហេតុផលបច្ចេកទេសប៉ុណ្ណោះ។ ក្រុមត្រូវការគ្រប់គ្រងការប្រកួតនេះឱ្យបានច្រើន និងធ្វើឡើងតាំងពីបើកឆាកតែម្ដង ដូច្នេះហើយទើបលោកសម្រេចចិត្តដាក់ Ronaldo អង្គុយបម្រុងសិន។ លោក Santos បានអះអាងទៀតថាលោកជាមួយ Ronaldo មិនមានបញ្ហាអ្វីនឹងគ្នាឡើយ។ ពួកគេស្គាល់គ្នាច្បាស់ និងធ្លាប់ធ្វើការជាមួយគ្នាជាច្រើនឆ្នាំមកហើយ៕