ក្លឹបបាល់ទាត់វិសាខា កំពុងចាប់ផ្ដើមជួសជុលទីលានរបស់ខ្លួនហើយ បន្ទាប់ពីចប់រដូវកាលនៅលីគកំពូលកម្ពុជាទៅ ដើម្បីត្រៀមខ្លួនប្រកួតអន្ដរជាតិនៅឆ្នាំ២០២៣ខាងមុខ។
ក្លឹបវិសាខា បានប្រកាសថា៖ “ដើម្បីលើកកម្ពស់សោភ័ណ្ឌភាព និងគុណភាពទីលានរបស់ពួកយើងឲ្យកាន់តែស្រស់ស្អាត និងល្អប្រសើរបន្ថែមទៀត នៅព្រឹកថ្ងៃទី០៦ ខែធ្នូ ឆ្នាំ២០២២ នេះ ក្លិបរបស់យើង បានចាប់ផ្ដើមធ្វើការជួសជុលស្មៅថ្មី នៅកីឡដ្ឋានព្រីនស៍ សម្រាប់ត្រៀមស្វាគមន៍រដូវកាលថ្មី និងការប្រកួតអន្ដរជាតិផ្សេងៗ នាពេលខាងមុខ ។ ការជួសជុលនេះ គ្រោងនឹងប្រើរយៈពេលពី ៣ ទៅ ៤ខែប៉ុណ្ណោះ”។
រំលឹកថាវិសាខា ជាជើងឯកពានរង្វាន់ Hun Sen Cup និងជើងឯករងលីគកំពូលកម្ពុជា។ ក្លឹបមួយនេះក្លាយជាក្លឹបដំបូងគេបំផុតដែលអាចឈ្នះពានរង្វាន់ Hun Sen Cup បានដល់ទៅ៣សម័យជាប់គ្នាឯណោះ៕