ប្រេស៊ីលបានធ្វើឲ្យអតីតតារាឆ្នើមរបស់ Man Utd លោក Roy Keane ខឹងសម្បារនៅពេលដែលគាត់សង្កត់ធ្ងន់ទៅលើរបៀបអបអរគ្រាប់បាល់ ដោយការរាំរបស់ពួកគេជាការមិនគោរពដល់ក្រុមគូបដិបក្ខ កូរ៉េខាងត្បូង។
ក្រុមម្ចាស់ជើងឯកពានរង្វាន់ពិភពលោក ៥សម័យកាលមួយនេះ បានយកឈ្នះកូរ៉េខាងត្បូង ៤-១ ក្នុងវគ្គ ១៦ក្រុមចុងក្រោយ ហើយពួកគេបានរាំជាក្រុមដើម្បីអបអររាល់គ្រាប់បាល់របស់ពួកគេ។
នៅពេល Richarlison រកបានគ្រាប់ទី៣ គាត់បានរត់ទៅកៅអីកីឡាករបម្រុង ហើយបានធ្វើឱ្យគ្រូបង្វឹក Tite ចូលរួមផងដែរ ហើយវាក៏ធ្វើឲ្យ Keane មានអារម្មណ៍មិនល្អនោះទេ។
Keane បាននិយាយនៅលើ ITV ថា៖
“ខ្ញុំស្ទើរតែមិនជឿនូវអ្វីដែលខ្ញុំកំពុងមើលនោះទេ វាដូចជាការមើលគេរាំក្នុងអារម្មណ៍ដ៏តឹងតែងមួយអញ្ចឹង។ ខ្ញុំមិនចូលចិត្តរឿងបែបនេះទេ។
គ្រប់គ្នានិយាយថាវាជាវប្បធម៌របស់ពួកគេ។ ប៉ុន្តែខ្ញុំគិតថា វាពិតជាមិនគោរពដល់គូបដិបក្ខនោះទេ។
វាមានគ្រាប់បាល់ចំនួនបួនគ្រាប់ ហើយពួកគេអបអរគ្រប់គ្រាប់។ ខ្ញុំមិនថាទេ បើវាជាគ្រាប់បាល់ដំបូង អបអរអញ្ចឹងមួយហើយមួយទៀត ហើយអ្នកគ្រប់គ្រងក៏ចូលរួមដែរ។ ខ្ញុំមិនសប្បាយចិត្តអំពីវាទេ។ ខ្ញុំគិតថាវាមិនល្អទាល់តែសោះ” ៕
ប្រភព៖ ITV